У рамках ХІ Міжнародных кнігазнаўчых чытанняў “Кніжная культура Беларусі XІ – пачатку XX ст.” адбудзецца ўрачыстае гашэнне паштовага блока, прысвечанага 525-годдзю з дня нараджэння Францыска Скарыны.
Паштовая прадукцыя, прысвечаная беларускаму і ўсходнеславянскаму першадрукару, мае даўнюю традыцыю. Сімвалічна, што прэзентацыя новага паштовага праекта пройдзе ў Нацыянальнай бібліятэцы Беларусі, якая з’яўляецца адзінай у краіне захавальніцай кніг Францыска Скарыны.
Беларускія паштовыя маркі маюць ярка выяўленую нацыянальную скіраванасць і адлюстроўваюць асноўныя аспекты развіцця нашай дзяржавы. У гэтых мастацкіх мініяцюрах знаходзяць адлюстраванне знакавыя падзеі гісторыі і культуры Беларусі. Безумоўна, паштовая прадукцыя, прысвечаная 525-годдзю з дня нараджэння Францыска Скарыны, стане добрым падарункам беларускім і замежным філатэлістам і паслужыць папулярызацыі кніжнай культуры Беларусі.
Гашэнне першага дня – гэта асаблівая падзея ў свеце філатэліі. Запрашаем на ўрачыстае гашэнне паштовага блока, якое пройдзе ў атрыуме бібліятэкі (2-гі паверх) 16 красавіка ў 11.30.
