З сакавіка 2021 года адменена ці зніжана аплата за апрацоўку артыкулаў (APC – англ. article processing charges) для аўтараў з Беларусі пры публікацыі артыкулаў у рэжыме адкрытага доступу ў вядучых навуковых часопісах.
Міжнародны кансорцыум бібліятэк EIFL у партнёрстве з Саветам бібліятэк Беларусі па інфармацыйным узаемадзеянні заключыў шэраг пагадненняў з вядучымі міжнароднымі выдавецтвамі, на аснове якіх гарантуецца адмена ці зніжэнне аплаты за апрацоўку артыкулаў (APC – англ. article processing charges) для аўтараў з Беларусі пры публікацыі артыкулаў у рэжыме адкрытага доступу ў аўтарытэтных навуковых часопісах, такіх як Reviews in the Neurosciences, Epidemiology & Infection, Computer Assisted Surgery, Nanocomposites і інш.
Тут прадстаўлены поўны спіс часопісаў (больш за 1 200), для якіх дзейнічаюць умовы гэтых пагадненняў. Два разы на год плануецца абнаўленне гэтага спісу. На старонцы https://eifl.net/apcs – дадатковая інфармацыя для аўтараў аб заключаных пагадненнях, у тым ліку аб тым, як запытаць адмену аплаты ці зніжку для пэўнага выдавецтва.
19 красавіка ў 12.00 Нацыянальная бібліятэка Беларусі праводзіць вэбінар, на якім слухачы змогуць азнаёміцца з асноўнымі тэндэнцыямі і перспектывамі развіцця руху адкрытага доступу, атрымаць падрабязную інфармацыю аб магчымасцях публікацыі навуковых артыкулаў у аўтарытэтных міжнародных часопісах у рэжыме адкрытага доступу (Open Access).
Запрашаем даследчыкаў прыняць удзел у вэбінары. Для гэтага неабходна запоўніць рэгістрацыйную форму.
Матэрыял пададзены аддзелам бібліятэчных тэхналогій.