22 красавіка ў іспанскім гарадку Эсківіас “Дон Кіхот” упершыню прагучаў на беларускай мове.
З 21 па 24 красавіка 2016 года па ініцыятыве Пасольства Беларусі ў Францыі адбыўся візіт у Іспанію дырэктара Нацыянальнай бібліятэкі Беларусі Рамана Матульскага.
Падчас візіту Р. Матульскі сустрэўся з дырэктарам Нацыянальнай бібліятэкі Іспаніі Анай Сантас Арамбура і абмеркаваў магчымасці наладжвання двухбаковага супрацоўніцтва паміж бібліятэкамі абедзвюх краін. Галоўнай бібліятэцы Іспаніі была перададзена ў дар калекцыя кніг лепшых беларускіх выданняў у рамках праекта “Беларусь сёння”.
У ходзе мерапрыемстваў праграмы “Мадрыд – сусветная сталіца кнігі” Раман Матульскі таксама прыняў удзел у IX Штогадовых “Сервантэсаўскіх чытаннях”, на якіх прадстаўнікі парадку 30 краін чыталі ўрыўкі са знакамітага твора іспанскага пісьменніка Мігеля дэ Сервантэса Сааведры “Хітры гідальга Дон Кіхот Ламанчскі” на роднай мове. Раман “Дон Кіхот” упершыню прагучаў на беларускай мове ў Доме-музеі Сервантэса ў гарадку Эсківіас у выкананні дырэктара Нацыянальнай бібліятэкі Беларусі.
У рамках візіту Раман Матульскі даў інтэрв’ю “Радыё Іспаніі” і правёў сустрэчы ў вядучых музеях Мадрыда – музеі Прада і Каралеўскім палацы.