Нацыянальная бібліятэка Беларусі прыняла ўдзел у святкаванні XXI Дня беларускага пісьменства, якое адбылося 6-7 верасня ў старажытным Заслаўі.
З нагоды свята Нацыянальная бібліятэка Беларусі падрыхтавала тэматычную кніжную выстаўку, прысвечаную Году гасціннасці, і прэзентавала свае апошнія выдавецкія праекты.
На выстаўцы “Беларусь: гасціннасць без межаў” былі прадстаўлены каля 120 сучасных навукова-папулярных, даведачных, рэкламна-інфармацыйных выданняў і літаратура канца XVIII – пачатку XX ст. краязнаўчай тэматыкі. Сучасную частку экспазіцыі склалі фотаальбомы, каталогі і буклеты, якія адлюстроўваюць багацце і прыгажосць беларускай зямлі, а таксама шматгранныя магчымасці беларускага турызму. Вандроўкай у гістарычную Беларусь стаў раздзел выстаўкі “Дарогамі, трактамі, сцежкамі…”, у якім прадстаўлены даведнікі і падарожныя нататкі канца XVIII – пачатку XX ст.
Кніжную выстаўку Нацыянальнай бібліятэкі Беларусі наведалі афіцыйныя асобы, дзеячы навукі і мастацтва, журналісты, школьнікі, настаўнікі, госці з розных рэгіёнаў краіны.
У гэтыя святочныя дні асаблівую ўвагу прыцягнулі прэзентацыі нацыянальных праектаў па вяртанні і папулярызацыі кніжнай спадчыны, якія былі рэалізаваны ў апошні час Нацыянальнай бібліятэкай Беларусі:
- прэзентацыя факсімільнага перавыдання кніжнай спадчыны Францыска Скарыны – пяці першых тамоў з поўнага збору прац беларускага першадрукара. Выдавецкі праект разлічаны на перыяд 2013–2017 гг. і прымеркаваны да 500-годдзя айчыннага кнігадрукавання. Ініцыятарамі і асноўнымі выканаўцамі праекта сталі банк БелВЭБ, Нацыянальная бібліятэка Беларусі і выдавецтва “Калекшн”. Каштоўнае выданне атрымала ў дар заслаўская гарадская бібліятэка;
- прэзентацыя факсімільнага перавыдання Тураўскага Евангелля (XI стагоддзе) – самага старажытнага кніжнага помніка Беларусі і аднаго з найдаўнейшых ва Усходняй Еўропе. Выданне з’яўляецца сумесным праектам кампаніі Xerox і Нацыянальнай бібліятэкі Беларусі. Унікальная кніга была перададзена ў фонд Мінскай абласной бібліятэкі імя А.С. Пушкіна;
- прэзентацыя фотаальбома “Кніжная спадчына Беларусі”, які падрыхтаваны сумесна з выдавецтвам “Беларуская Энцыклапедыя імя Петруся Броўкі” і ўключае выявы найбольш значных кніжных помнікаў з фондаў галоўнай бібліятэкі краіны. Унікальныя беларускія рукапісы, каштоўныя старадрукаваныя і рэдкія кнігі мінулых стагоддзяў, цудоўныя картаграфічныя і выяўленчыя выданні, кнігі з вядомых беларускіх збораў пераконваюць у самабытнасці і развітасці айчыннай культуры, яе багацці і разнастайнасці.
Прэзентацыі гэтых выданняў пазнаёмілі шырокую грамадскасць з найбольш каштоўнымі скарбамі кніжнай культуры Беларусі.
Чытайце таксама: