Нацыянальная бібліятэка Беларусі прыме ўдзел у святкаванні XXI Дня беларускага пісьменства, якое адбудзецца 6–7 верасня ў старажытным Заслаўі.
У дні святочных мерапрыемстваў Нацыянальная бібліятэка Беларусі арганізуе тэматычную кніжную выстаўку, прысвечаную Году гасціннасці, і прэзентуе свае апошнія выдавецкія праекты.
На выстаўцы “Беларусь: гасціннасць без межаў” будуць прадстаўлены каля 120 сучасных навукова-папулярных, даведачных, рэкламна-інфармацыйных выданняў і літаратура канца XVIII – пачатку XX ст. краязнаўчай тэматыкі. Сучасную частку экспазіцыі складуць фотаальбомы, каталогі і буклеты, якія адлюстроўваюць багацце і прыгажосць беларускай зямлі, а таксама шматгранныя магчымасці беларускага турызму. Вандроўкай у гістарычную Беларусь стануць даведнікі і падарожныя нататкі канца XVIII – пачатку XX ст.
У рамках святкавання Дня беларускага пісьменства Нацыянальная бібліятэка Беларусі прадставіць нацыянальныя праекты па вяртанні і папулярызацыі кніжнай спадчыны, якія рэалізаваны ў апошні час і закліканы пазнаёміць шырокую грамадскасць з найбольш каштоўнымі скарбамі кніжнай культуры Беларусі. Выданні былі падрыхтаваны з выкарыстаннем самых новых тэхналогій у суправаджэнні гістарычных і кнігазнаўчых даследаванняў.
Праграма прэзентацый праектаў:
- прэзентацыя факсімільнага перавыдання кніжнай спадчыны Францыска Скарыны – пяці першых тамоў з поўнага збору прац першадрукара. Выдавецкі праект разлічаны на перыяд 2013–2017 гг. і прымеркаваны да 500-годдзя айчыннага кнігадрукавання. Ініцыятарамі і асноўнымі выканаўцамі праекта з’яўляюцца банк БелВЭБ, Нацыянальная бібліятэка Беларусі і выдавецтва “Калекшн”. Выданне адзначана на ХІ Міжнародным конкурсе “Мастацтва кнігі” дзяржаў – удзельніц СНД. Прэзентацыя пройдзе 6 верасня а 13.10 на цэнтральнай сцэне;
- прэзентацыя факсімільнага перавыдання Тураўскага Евангелля (XI стагоддзе) – самага старажытнага кніжнага помніка Беларусі і аднаго з найдаўнейшых ва Усходняй Еўропе. Выданне з’яўляецца сумесным праектам кампаніі Xerox і Нацыянальнай бібліятэкі Беларусі. Прэзентацыя пройдзе 6 верасня а 17.20 на цэнтральнай сцэне;
- прэзентацыя фотаальбома “Кніжная спадчына Беларусі”, які падрыхтаваны бібліятэкай сумесна з выдавецтвам “Беларуская Энцыклапедыя імя Петруся Броўкі” і ўключае выявы найбольш значных кніжных помнікаў, якія сёння зберагаюцца ў фондах галоўнай бібліятэкі краіны. Унікальныя беларускія рукапісы, каштоўныя старадрукі і рэдкія кнігі мінулых стагоддзяў, цудоўныя картаграфічныя і выяўленчыя выданні, кнігі з вядомых беларускіх кнігазбораў пераконваюць у самабытнасці і развітасці айчыннай культуры, яе багацці і разнастайнасці. Прэзентацыя пройдзе 7 верасня а 13.40 на цэнтральнай сцэне.
Тэлефоны для даведак: (8 017) 293 27 56, 293 29 80.
Е-mail: pr@nlb.by
Чытайце таксама:
