Псалтыр – першая друкаваная беларуская кніга, адна з найбольш старажытных і папулярных кніг Старога Запавету. Асноўны яе змест духоўныя песні – псалмы.
Паводле старажытнай традыцыі, асноўным аўтарам псалмоў лічыцца цар і прарок Давід. Псалом – гэта высокамастацкі паэтычны твор, род духоўнай паэзіі.
Яшчэ са старазапаветных часоў і да сённяшняга дня Псалтыр – важны элемент набажэнства. Ён з’яўляецца шырока распаўсюджанай кнігай, якая часта выдаецца. Нароўні з азбукай Псалтыр выкарыстоўваўся і для навучання дзяцей і юнацтва грамаце. Важна адзначыць, што шырокая папулярнасць і запатрабаванасць кнігі стала прычынай таго, што Ф. Скарына выбраў яе ў якасці свайго першага выдання.
Дата выхаду кнігі – 6 жніўня 1517 г. – пазначана ў самім выданні, у пасляслоўі. Кніга невялікага фармату – у чацвёртую долю аркуша. Аформлена гравюрамі, застаўкамі, ініцыяламі.
Усяго ў Нацыянальнай бібліятэцы Беларусі захоўваецца 10 старазапаветных кніг, выдадзеных Францыскам Скарынам. Што тычыцца Псалтыра, то ў свеце ўлічана 2 асобнікі, яны захоўваюцца ў Расійскай Нацыянальнай бібліятэцы (Санкт-Пецярбург) і ў Дзяржаўным гістарычным музеі (Масква).
Да 500-годдзя беларускага кнігадрукавання Нацыянальнай бібліятэкай Беларусі рэалізаваны міжнародны навуковы і выдавецкі праект “Кніжная спадчына Францыска Скарыны” па факсімільным перавыданні ўсіх кніг беларускага першадрукара.
Матэрыял пададзены навукова-даследчым аддзелам кнігазнаўства.
