20 лютага ў Анкары адбылося ўрачыстае адкрыццё Прэзідэнцкай бібліятэкі Турцыі з удзелам Прэзідэнта Турэцкай Рэспублікі Рэджэпа Таіпа Эрдагана. Выступаючы на цырымоніі, ён адзначыў, што бібліятэка была спраектавана не толькі як будынак з кніжнымі паліцамі, але і як цэнтр мудрасці і культуры, які аб'ядноўвае людзей.
У адкрыцці ўзялі ўдзел шматлікія замежныя госці – Прэзідэнт Рэспублікі Узбекістан Шаўкат Мірзіёеў, прадстаўнікі дыпламатычнага корпуса замежных краін, Надзвычайны і Паўнамоцны Пасол Рэспублікі Беларусь у Турэцкай Рэспубліцы Віктар Рыбак. У ліку запрошаных быў і генеральны дырэктар Нацыянальнай бібліятэкі Беларусі Раман Матульскі.
Будаўніцтва найбуйнейшай бібліятэкі Турцыі пачалося ў 2016 г. па ініцыятыве Рэджэпа Эрдагана. Будынак размяшчаецца ўнутры Прэзідэнцкага комплексу і мае плошчу 125 000 м2, што дазваляе штодня прымаць да 5 тысяч наведвальнікаў. Калекцыя бібліятэкі налічвае 4 мільёны друкаваных дакументаў, больш за 120 мільёнаў электронных выданняў, 550 тысяч электронных кніг, рукапісаў і старадрукаваных дакументаў.
У снежні 2019 г. Нацыянальная бібліятэка Беларусі пры садзейнічанні Пасольства Рэспублікі Беларусь у Турэцкай Рэспубліцы перадала ў фонд Прэзідэнцкай бібліятэкі шматтомнае факсімільнае выданне “Кніжная спадчына Францыска Скарыны”, факсімільнае выданне “Буквар”, а таксама калекцыю беларускіх выданняў у рамках праекта “Беларусь сёння”.
Матэрыял прадастаўлены аддзелам сувязей з грамадскасцю.