23 сакавіка ў Нацыянальнай парламенцкай бібліятэцы Грузіі адбылося мерапрыемства, прысвечанае 500-годдзю беларускага кнігадрукавання.
Дырэктар Нацыянальнай бібліятэкі Беларусі Раман Матульскі прэзентаваў міжнародны навуковы і выдавецкі праект па ўзнаўленні кніжнай спадчыны Францыска Скарыны і перадаў у дар шматтомнае факсіміле выданняў беларускага першадрукара.
Раман Сцяпанавіч расказаў прысутным пра асноўныя этапы праекта і плённае супрацоўніцтва па яго рэалізацыі з Банкам БелВЭБ. Дзякуючы сумесным намаганням у год святкавання 500-годдзя беларускага кнігадрукавання ўнікальнае выданне стала стрыжнем святочных мерапрыемстваў, якія прайшлі ва ўсім свеце.
Таксама Раман Матульскі прадставіў удзельнікам мерапрыемства прэзентацыю аб Нацыянальнай бібліятэцы Беларусі: яе гісторыі, незвычайнай архітэктуры, інфармацыйных рэсурсах, каштоўных калекцыях выданняў мінулых стагоддзяў і магчымасцях установы як найбуйнейшага сацыякультурнага і інфармацыйнага цэнтра.
Пасля цырымоніі дарэння Раман Матульскі правёў перагаворы з генеральным дырэктарам Нацыянальнай парламенцкай бібліятэкі Грузіі Георгіем Кекелідзе, а таксама ў ходзе агляднай экскурсіі азнаёміўся з працай установы.
Дакумент, які заклікае ўмацаваць міжкультурныя сувязі паміж бібліятэкамі, быў падпісаны 22 сакавіка ў рамках перагавораў кіраўнікоў дзяржаў Беларусі і Грузіі ў пашыраным складзе. Мемарандум аб супрацоўніцтве паміж Нацыянальнай бібліятэкай Беларусі і Нацыянальнай парламенцкай бібліятэкай Грузіі стварае ўмовы для супрацоўніцтва ў галіне навукі і культуры, распаўсюджвання і абмену інфармацыйнымі рэсурсамі.
Фота прэс-службы Нацыянальнай парламенцкай бібліятэкі Грузіі.
