Пашырыць уяўленне аб культурнай прасторы Гродна, азнаёміцца з яго скульптурнымі кампазіцыямі дапаможа электронны рэсурс “Манументальная памяць г. Гродна”.
Віртуальная чытальная зала Нацыянальнай бібліятэкі Беларусі знаёміць з базай даных Гродзенскай гарадской цэнтральнай бібліятэкі імя А. Макаёнка “Манументальная памяць г. Гродна”.
Сталіца Гродзенскай вобласці – горад з багатай гісторыка-культурнай спадчынай. Многія людзі спрыялі яго эканамічнаму, навуковаму і культурнаму развіццю, абаранялі Радзіму ў гады ваенных ліхалеццяў. У гонар іх у Гродне ўстаноўлены бюсты, скульптуры, манументы, барэльефы, памятныя дошкі – розныя віды помнікаў, якія сімвалізуюць беззапаветнае служэнне грамадзян сваёй Радзіме і ўвекавечваюць нашу памяць пра іх.
База даных “Манументальная памяць г. Гродна” змяшчае звесткі аб важнейшых скульптурных аб’ектах горада. Гісторыкі, краязнаўцы, а таксама ўсе, хто цікавіцца выяўленчым мастацтвам, атрымаюць кароткую інфармацыю пра аўтара, час стварэння, месца размяшчэння, а таксама пра увекавечаную ў скульптурным аб’екце асобу, якая ўславіла сваёй дзейнасцю Гродна і Гарадзеншчыну.
Доступ да інфармацыі магчымы са старонак вэб-навігатара “Беларусь у інфармацыйнай прасторы” і віртуальнай чытальнай залы.
Матэрыял прадастаўлены аддзелам карпаратыўнага ўзаемадзеяння.