30 снежня прайшоў навагодні канцэрт для супрацоўнікаў “скарбніцы ведаў”.
Павіншаваць калектыў з надыходзячымі святамі прыляцеў сам Дзед Мароз са Снягуркай і сваімі памочніцамі. Вясёлае караоке, салодкія падарункі і энергічныя танцы не пакінулі нікога абыякавым. Усмешкі і смех суправаджалі ўсё мерапрыемства.
Генеральны дырэктар Нацыянальнай бібліятэкі Раман Матульскі ў віншаванні адзначыў: “Новага года мы так не чакалі даўно, напэўна, з далёкага дзяцінства. Мы не столькі чакаем новага года, колькі жадаем, каб хутчэй прайшоў стары. Спадзяёмся, што новы год – моцны год Быка – дасць нам сілу, упэўненасць і зробіць больш паспяховымі. Жадаю ўсім вам здароўя. Каб мы змаглі зняць маскі, дыхнуць на поўныя грудзі, паглядзець адзін аднаму ў вочы і нарэшце сардэчна абняць адзін аднаго”.
Пасля канцэртнай праграмы супрацоўнікам уручылі чароўныя снежкі, каб кожны, падкінуўшы, загадаў сваё запаветнае жаданне. А напрыканцы зладзілі святочную фотасесію ў казачнай фотазоне.
Матэрыял пададзены аддзелам сувязей з грамадскасцю.
