5 сакавіка ў Гомельскай абласной універсальнай бібліятэцы імя У.І. Леніна прайшоў абласны семінар для дырэктараў сетак публічных бібліятэк “Публічныя бібліятэкі сёння: ад дасягнутага да новага”.
На мерапрыемстве падвялі вынікі працы за 2018 год, абмеркавалі надзённыя праблемы, якія стаяць перад бібліятэкамі, выпрацавалі перспектыўныя напрамкі развіцця. Загадчыца навукова-даследчага аддзела бібліятэказнаўства Нацыянальнай бібліятэкі Беларусі Марына Пшыбытка выступіла з дакладам “Дзейнасць публічных бібліятэк Беларусі ў 2018 годзе: асноўныя вынікі”.
Для прадстаўнікоў устаноў культуры і адукацыі Гомельскай вобласці ў рамках Года малой радзімы дырэктар Нацыянальнай бібліятэкі Беларусі Раман Матульскі правёў адкрытую лекцыю па тэме “Тэндэнцыі і асаблівасці развіцця кніжнай культуры Беларусі ў XI–XX стст. у кантэксце агульнаеўрапейскай і нацыянальнай гісторыі”.
У рамках дабрачыннай акцыі Нацыянальнай бібліятэкі Беларусі “Чытанне – прастора інфармацыі і ведаў” бібліятэкам Гомельшчыны была перададзена мастацкая, гістарычная, вучэбна-метадычная літаратура, кнігі па культуры і мастацтве – усяго каля 900 выданняў. Матэрыялы папоўнілі фонды Гомельскай абласной бібліятэкі імя У.І. Леніна, Цэнтралізаванай бібліятэчнай сеткі Гомельскага раёна, Сеткі публічных бібліятэк г. Гомеля і Петрыкаўскай раённай цэнтралізаванай бібліятэчнай сістэмы.
Большая частка перададзенай літаратуры – каля 600 выданняў – паступіла ў бібліятэку в. Клімаўка Цэнтралізаванай бібліятэчнай сеткі Гомельскага раёна, якая панесла страты ў выніку пажару ў кастрычніку мінулага года.
Матэрыял прадастаўлены аддзелам сувязей з грамадскасцю.
