6 верасня ў Бялыніцкім раённым цэнтры культуры прайшла прэзентацыя “Інфармацыйныя скарбы зямлі беларускай. Магілёўшчына”.
Нацыянальная бібліятэка Беларусі падрыхтавала шэраг мерапремстваў да XXVII Дня беларускага пісьменства. Распачалася праграма з прэзентацыі праектаў.
Падчас Рэспубліканскай навукова-практычнай канферэнцыі “Бялыніцкія чытанні – 2020” галоўны бібліёграф навукова-даследчага аддзела бібліяграфіі Андрэй Бараноўскі выступіў з паведамленнем на тэму “Магілёўшчына ў краязнаўчых электронных рэсурсах Нацыянальнай бібліятэкі Беларусі”.
З 2010 г. Нацыянальная бібліятэка Беларусі сумесна з найбуйнейшымі бібліятэчнымі, архіўнымі і навуковымі ўстановамі нашай краіны паспяхова працуе над шэрагам віртуальных і мультымедыйных праектаў па папулярызацыі гісторыі і культуры Беларусі.
Магілёўшчына была багата прадстаўлена ў праектах “Памятныя кніжкі Магілёўскай губерні» (2011), “100 год з гісторыі Беларускай дзяржаўнай сельскагаспадарчай акадэміі: дакументы і матэрыялы 1840–1940 гг.: да 175-годдзя з дня адкрыцця” (2015), “Рэгіянальная гісторыя Беларусі ў дакументах і матэрыялах Віленскай археаграфічнай камісіі (1864–1915)” (2017, 2018 гг.).
Удзельнікам канферэнцыі праанансавалі новае мультымедыйнае выданне “Быхаў – старажытны беларускі фарпост”, якое Нацыянальная бібліятэка Беларусі рыхтуе сумесна з Быхаўскай цэнтральнай раённай бібліятэкай і Быхаўскім раённым гісторыка-краязнаўчым музеем.
Мэта праекта – даць шырокую гістарычную панараму аднаго з самых цікавых гарадоў Беларусі. Падчас працы ўжо выяўлены і сістэматызаваны розныя крыніцы, падрыхтавана больш за 700 лічбавых копій дакументаў па гісторыі Быхаўшчыны – як аналітычных, так і паўнатэкставых, сабраная разнастайная суправаджальная інфармацыя. Выданне будзе карысна ўсім аматарам айчыннай гісторыі.
Матэрыял пададзены аддзелам сувязей з грамадскасцю.