6 верасня на пляцоўцы Бялыніцкага раённага цэнтра культуры распачалася кніжна-ілюстрацыйная выстаўка “Духоўныя скарбы зямлі беларускай”. Экспазіцыя пачала работу ў рамках XXVII Дня беларускага пісьменства.
Выстаўка складаецца з чатырох тэматычных раздзелаў. “Беларусь праваслаўная і каталіцкая” распавядае аб храмах нашай краіны. Яны з’яўляюцца носьбітамі шматвекавой гісторыі народа, якому давялося шмат вынесці, і у той жа час перадаюць памкненне да міру, адданасці гуманістычным ідэалам.
Раздзел “Іканапісь Беларусі” прысвечаны помнікам сакральнага жывапісу і станаўленню іканапіснай школы на беларускіх землях. У ім прадстаўлены работы вядомых даследчыкаў дадзенай тэмы: Н.Ф. Высоцкай, Г.А. Флікоп-Світы, Г.Р. Нячаевай.
У 2020 годзе беларусы святкуюць 550-годдзе з’яўлення цудатворнага абраза Маці Божай. Асобны раздзел выстаўкі – “Жыровіцкая святыня” – прысвечаны Жыровіцкаму Успенскаму мужчынскаму кляштару, дзе захоўваецца святыня, шанаваная не толькі беларусамі, але і вернікамі іншых краін.
Заключная частка выстаўкі “Іконы: даследаванні” змяшчае выданні аб феномене іконы з пункту гледжання тэалогіі, іканаграфіі і нават уфалогіі. Менавіта манаграфія вучонага-ўфолага І. Бутава прысвечана феномену абнаўлення ікон і іншых цудаў, якія мелі месца на тэрыторыі Украіны, Расіі і Беларусі ў ХІХ – першай палове ХХ стст.
Матэрыял пададзены аддзелам сувязей з грамадскасцю.
