16 кастрычніка ў бібліятэцы адбыліся прэзентацыя кнігі “Бачу Беларусь такой” і адкрыццё фотавыстаўкі Уладзіслава Цыдзіка, прысвечаныя Году малой радзімы.
Удзельнікі мерапрыемства адразу акунуліся ў атмасферу творчасці. Вядучы прэзентацыі, беларускі паэт, публіціст, галоўны дырэктар міжнароднага радыё “Беларусь” Навум Гальпяровіч прачытаў уласны верш “Якой я бачу Беларусь” і выказаў сваё стаўленне да выдання:
– Сёння, тут, у галоўным кніжным храме краіны – Нацыянальнай бібліятэцы Беларусі – адпраўляецца ў вялікае жыццё новае выданне. Дарэчы, яго падтрымалі і нашы аматары мастацкага слова. Вершы 65 сучасных беларускіх паэтаў удала дапаўняюць фотаздымкі. Узнёслыя словы гучаць, як гімн улюбёнасці ў родную зямлю, яе цудоўныя краявіды.
Сярод выступоўцаў таксама былі прадстаўнікі Выдавецкага дома “Звязда”, палітыкі, культурныя дзеячы, паэты, аўтары і выканаўцы песняў.
Кніга “Бачу Беларусь такой” выйшла пры падтрымцы Міністэрства інфармацыі Рэспублікі Беларусь у 2018 годзе адразу на трох мовах – беларускай, англійскай і рускай. Яна з’яўляецца своеасаблівым працягам тэмы, распачатай два гады таму ў фотаальбоме “Зачараваны Беларуссю”. Асаблівасцю новай кнігі сталі апублікаваныя ў ёй вершы. Укладальнік абодвух выданняў – Алена Стэльмах, пісьменніца, першы намеснік старшыні Саюза пісьменнікаў Беларусі.
Першы намеснік дырэктара Нацыянальнай бібліятэкі Беларусі Алена Даўгаполава выказала падзяку за цікавы праект да Года малой радзімы і ва ўрачыстай абстаноўцы разам з фатографам Уладзіславам Цыдзікам перарэзала стужку, пазначыўшы адкрыццё выстаўкі здымкаў, якія ўвайшлі ў новую кнігу.
44 фотапогляды на краіну пазнаёмяць наведвальнікаў з разнастайнайнымі куткамі Беларусі. Аўтар здымкаў Уладзіслаў Цыдзік – чалавек, апантаны творчасцю. У розных па сваіх кампазіцыйных памкненнях, ілюстрацыях бачны не толькі адбіткі рэчаіснасці, позірк сведкі падзей, але і высокая праява натуры майстра.
Выстаўка будзе працавать у галереі “Ракурс” да 16 лістапада 2018 г.
Дата яе заканчэння можа быць зменена.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра бібліятэкі.
Прадстаўленыя кнігі можна заказаць праз электронны каталог Нацыянальнай бібліятэкі Беларусі.
Тэлефон для даведак: (8 017) 293 28 61.
Е-mail: pr@nlb.by
Глядзіце таксама пра прэзентацыю кнігі "Бачу Беларусь такой" сюжэт СТВ і наш фотарэпартаж:
