28 верасня ў Нацыянальнай бібліятэцы Беларусі адбылася ўрачыстая цырымонія ўзнагароджання ўдзельнікаў рэспубліканскага конкурсу “Мір у душы – мір у краіне” ў намінацыі “Верш” у рамках творчага праекта “Шчасце – жыць у мірнай краіне!”.
Традыцыйна канец верасня ў Беларусі – асаблівы перыяд. У гэтым адрэзку часу тры значныя даты: Дзень народнага адзінства (17 верасня), Дзень міру Рэспублікі Беларусь (трэці аўторак верасня), Міжнародны дзень міру (21 верасня). Сімвалічна, што ўзнагароджанне пераможцаў рэспубліканскага конкурсу адбылося ў рамках святкавання гэтых дат.
У мерапрыемстве ўзялі ўдзел прадстаўнікі парламента, урада, міністэрстваў Рэспублікі Беларусь, замежных дыпламатычных місій і арганізацый, кіраўнікі рэлігійных канфесій, кіраўнікі грамадскіх аб’яднанняў, вядомыя паэты і пісьменнікі, прадстаўнікі сродкаў масавай інфармацыі. Ганаровыя госці зачыталі выбраныя вершы і ўручылі памятныя падарункі. Генеральны дырэктар Нацыянальнай бібліятэкі Беларусі Аксана Кніжнікава зачытала твор “Мая краіна – мае людзі” Любові Ляшчынскай і адзначыла аўтара спецыяльным прызам – альбомам “Нацыянальная бібліятэка Беларусі. 100 гадоў”.
У рамках урачыстай цырымоніі ўзнагароджання пераможцаў старшыня праўлення Беларускага фонду міру Максім Місько перадаў у фонды Нацыянальнай бібліятэкі Беларусі трылогію кніг “Краіна міру. Вершы”, “Краіна міру. Проза”, “Храмы краіны. Малюнкі”. Выданні з лепшымі работамі пераможцаў рэспубліканскага конкурсу “Мір у душы – мір у краіне” стануць каштоўным папаўненнем калекцыі галоўнай бібліятэкі краіны.
Для пераможцаў і лаўрэатаў конкурсу была праведзена экскурсія па “алмазе ведаў”, падчас якой госці пазнаёміліся з архітэктурай і мастацкім афармленнем будынка, даведаліся больш пра векавую гісторыю Нацыянальнай бібліятэкі, пабывалі ў музеі кнігі і падняліся на аглядную пляцоўку.
Рэспубліканскі конкурс “Мір у душы – мір у краіне” праводзіцца з 2018 года грамадскім аб’яднаннем “Беларускі фонд міру”. Сёлета ён арганізаваны пры падтрымцы Міністэрства адукацыі Рэспублікі Беларусь і Беларускай праваслаўнай царквы і накіраваны на распаўсюджванне духоўна-маральных, нацыянальных і культурных каштоўнасцей, а таксама ідэі каштоўнасці міру і патрыятызму сярод навучэнцаў Рэспублікі Беларусь, умацавання дружбы і згоды ў грамадстве.
Матэрыял пададзены аддзелам сувязей з грамадскасцю.
