17 верасня ў бібліятэцы адкрыўся выставачны праект “Ты з Заходняй, я з Усходняй нашай Беларусі” да 80-годдзя ўз'яднання Беларускай Савецкай Сацыялістычнай Рэспублікі.
Арганізатары – Нацыянальная бібліятэка Беларусі, Нацыянальны архіў Рэспублікі Беларусь, Беларускі дзяржаўны архіў кінафотадакументаў.
На мерапрыемстве выступілі першы намеснік дырэктара Нацыянальнай бібліятэкі Беларусі Алена Далгаполава, дырэктар Нацыянальнага архіва Рэспублікі Беларусь Андрэй Дземянюк, галоўны захавальнік фондаў Беларускага дзяржаўнага архіва кінафотадакументаў Ала Кот, вядучы навуковы супрацоўнік Нацыянальнага архіва Рэспублікі Беларусь, загадчык кафедры гісторыі Беларусі і славянскіх народаў БДПУ імя М. Танка Анатоль Вялікі.
Падчас мерапрыемства загадчык аддзела фарміравання электроннай бібліятэкі Нацыянальнай бібліятэкі Беларусі Віктар Пшыбытка прэзентаваў электронны рэсурс “Беларуская літаратурная спадчына. Часопісы, 1919–1939 гг.”. Яго карыстальнікам даступны беларускія літаратурныя часопісы, якія друкаваліся на тэрыторыях БССР і Заходняй Беларусі з 1919 па 1939 гады. Гэта больш за 1 300 нумароў з фондаў Нацыянальнай бібліятэкі Беларусі, Прэзідэнцкай бібліятэкі Рэспублікі Беларусь, Бібліятэкі Акадэміі навук Літвы і іншых інфармацыйных устаноў Беларусі і замежных краін.
Як прайшло адкрыццё выставачнага праекта, глядзіце ў сюжэтах тэлеканалаў АНТ і СТВ.
Матэрыял прадастаўлены аддзелам сувязей з грамадскасцю.
