31 мая на базе Барысаўскай цэнтральнай раённай бібліятэкі імя І.Х. Каладзеева прайшла абласная школа дырэктара на тэму “Публічная бібліятэка сёння: новыя стратэгіі ў дзейнасці”.
Напярэдадні пасяджэння, яго ўдзельнікі наведалі Зембінскі цэнтр культуры, пазнаёміліся з працай сельскай бібліятэкі № 21 в. Зембін, гарадской бібліятэкі № 1 г. Барысава і Барысаўскай цэнтральнай раённай бібліятэкі імя І.Х. Каладзеева.
Супрацоўнікі Нацыянальнай бібліятэкі як метадычнага і каардынацыйнага цэнтра бібліятэк Беларусі таксама былі запрошаны на семінар.
Загадчыца сектара навукова-даследчага аддзела бібліятэказнаўства Анастасія Маслоўская пазнаёміла ўдзельнікаў пасяджэння з вынікамі работы публічных бібліятэк рэспублікі ў 2022 годзе, зрабіўшы акцэнты на праблемныя пытанні бібліятэчнай галіны.
Галоўны бібліёграф навукова-даследчага аддзела кнігазнаўства Галіна Кірэева падзялілася з калегамі методыкай работы Нацыянальнай бібліятэкі з рэдкай кнігай на этапах яе выяўлення, апісання і ўліку, распавяла пра тонкасці гэтага кірунку бібліятэчнай дзейнасці, сфакусіравала ўвагу калег на асаблівых, далікатных яе момантах.
Ірына Кукета, галоўны бібліятэкар навукова-даследчага аддзела бібліятэказнаўства, у сваім выступленні асвятліла работу Нацыянальнай бібліятэкі па метадычным суправаджэнні дзейнасці публічных цэнтраў прававой інфармацыі, якія дзейнічаюць на базе бібліятэк сістэмы Міністэрства культуры Рэспублікі Беларусь, а таксама азнаёміла з вынікамі статыстычнага маніторынгу іх дзейнасці па выніках 2022 года.
Матэрыял пададзены навукова-даследчым аддзелам бібліятэказнаўства.