26 лістапада ў Нацыянальнай бібліятэцы Беларусі адбылося адкрыццё VI Беларускіх Калядных чытанняў.
Тэма гэтага года – “Гістарычная памяць народа: 550-годдзе з’яўлення Жыровіцкай іконы Божай Маці, 500-годдзе Жыровіцкага манастыра, 800-годдзе святога дабравернага князя Аляксандра Неўскага”.
У пленарным пасяджэнні ўдзельнічалі Мітрапаліт Мінскі і Заслаўскі Веніямін, Патрыяршы Экзарх усяе Беларусі; генеральны дырэктар Нацыянальнай бібліятэкі Беларусі Раман Матульскі, прадстаўнікі міністэрстваў і ведамстваў, духавенства.
Сённяшняя канферэнцыя стала добрай пляцоўкай для разгляду актуальных пытанняў плённага супрацоўніцтва царквы і дзяржавы, маральнай сферы і гісторыка-культурнай спадчыны.
На навукова-практычным форуме абмяркоўвалася важнасць юбілейных дат для кожнага праваслаўнага хрысціяніна. Належная ўвага была нададзена бясцэннаму набытку беларусаў – 550-годдзю з’яўлення Жыровіцкай іконы Божай Маці, гісторыі і значэнню святой мясціны – 500-гадоваму Жыровіцкаму манастыру. Па гэтай тэме з дакладам “Жыровіцкае Евангелле: гісторыя і сучаснасць” выступіў намеснік генеральнага дырэктара – дырэктар па навуковай рабоце і выдавецкай дзейнасці Нацыянальнай бібліятэкі Беларусі Аляксандр Суша. Знакавай датай з’яўляецца і 800-годдзе святога дабравернага князя Аляксандра Неўскага, які застаўся ў памяці вялікім прыкладам пакоры дзеля выратавання свайго народа.
Важнай падзеяй мерапрыемства стала ўрачыстая цырымонія перадачы адноўленага напрастольнага Тураўскага крыжа XII–XIII стагоддзяў Нацыянальнай акадэміі навук Беларусі. Рэліквія выканана з кіпарысавага дрэва, пакрытага залатымі пласцінамі і каштоўнымі камянямі падобна крыжу, створанаму па замове прападобнай Еўфрасінні Полацкай. Каштоўнасць з’яўляецца адным са знакаў адраджэння духоўнасці нашай краіны.
Спецыяльна да VI Беларускіх Калядных чытанняў Нацыянальная бібліятэка Беларусі арганізавала тэматычную выставу. На ёй прадстаўлены праекты бібліятэкі па факсімільным перавыданні помнікаў беларускай культуры: Баркалабаўскі летапіс, Тураўскае Евангелле, Жыціе Еўфрасінні Полацкай, Слуцкае Евангелле, Полацкае Евангелле, кніжная спадчына Францыска Скарыны.
Іншыя мерапрыемствы і секцыйныя пасяджэнні VI Беларускіх Калядных чытанняў пройдуць на розных пляцоўках і ў дыстанцыйным фармаце.
Глядзіце таксама рэпартажы тэлеканалаў "АНТ", "Беларусь 1".
Матэрыял пададзены аддзелам сувязей з грамадскасцю.
