27 чэрвеня ў галерэі “Лабірынт” адбыўся творчы вечар пісьменніка Анатоля Бутэвіча і прэзентацыя яго новай кнігі.
На творчым вечары Анатоль Іванавіч прадставіў сваю новую кнігу “Таямніцы Нясвіжскага замка. Падарожжа ўглыб стагоддзяў з Уладзіславам Сыракомлем”, якая выйшла ў выдавецкім доме “Звязда”. На яе старонках аўтар апавядае пра найбольш значныя і займальныя старонкі гісторыі Нясвіжскага замка, горада Нясвіжа і роду князёў Радзівілаў, якія лічыліся некаранаванымі каралямі.
На мерапрыемстве выступілі першы намеснік дырэктара Нацыянальнай бібліятэкі Беларусі Алена Далгаполава, дырэктар выдавецкага дома «Звязда» Аляксандр Карлюкевіч, старшыня Нясвіжскага раённага савета дэпутатаў Валерый Лазюк, пісьменнік, паэт, публіцыст, журналіст, галоўны дырэктар радыёстанцыі “Беларусь” Навум Гальпяровіч, народная артыстка Беларусі, прыма Нацыянальнага акадэмічнага тэатра імя Янкі Купалы Марыя Захарэвіч, аўтар кнігі серыі “Сем цудаў Беларусі”, дзяржаўны дзеяч, пісьменнік, перакладчык, публіцыст і крытык Анатоль Бутэвіч і іншыя.
З юбілеем і выданнем новай кнігі пісьменніка прыйшлі павіншаваць сябры, калегі і аматары яго творчасці. У адрас Анатоля Бутэвіча гучалі шчырыя віншаванні. Аўтар кнігі “Таямніцы Нясвіжскага замка. Падарожжа ўглыб стагоддзяў з Уладзіславам Сыракомлем” падзяліўся з прысутнымі сваімі ўражаннямі ад працы над творам і раздаў усім жадаючым аўтографы.
Творчыя нумары для гасцей вечара выканалі вакальная група народнага ансамбля народнай песні “Гаманіна” і студэнт Беларускага дзяржаўнага ўніверсітэта інфарматыкі і радыёэлектронікі, удзельнік вакальнай студыі “Шанс” Мікіта Дубко.