9 красавіка прайшло адкрыццё спецыялізаванай выстаўкі XXVI Міжнароднага форума па інфармацыйна-камунікацыйных тэхналогіях “ТІБО-2019”.
На цэнтральным стэндзе Нацыянальная бібліятэка Беларусі прадставіла мультымедыйны праект “Станаўленне беларускай дзяржаўнасці: па старонках беларускіх газет 1917–1922 гг.”.
Электроннае выданне з’яўляецца сумесным праектам Нацыянальнай бібліятэкі Беларусі і Нацыянальнага архіва Рэспублікі Беларусь.
На двух дысках размешчаны копіі каля 2 400 нумароў газет (амаль 80 назваў), якія выходзілі ў 1917–1922 гг. на тэрыторыі сучаснай Беларусі і за яе межамі, але мелі дачыненне да Беларусі.
У DVD уключаны газеты, якія былі выдадзены ў Мінску, Вільні, Віцебску, Магілёве, Гродне, Гомелі, Бабруйску, Маскве, Оршы, Смаленску, Варшаве, Мазыры, Полацку, Маладзечне, Рагачове.
Кантэнт электроннага выдання складае прэса розных грамадска-палітычных сіл – ад хрысціянска-дэмакратычнай “Krynica” да бальшавіцкай “Звезды” – пераважна на рускай і беларускай мовах, і прадстаўлены толькі 2 выданні на польскай мове: “Dziennik Grodzieński” (“Гродзенская газета”, Гродна) і “Głos robotniczy” (“Рабочы голас”, Вільня). Віленскія выданні “Homan” і “Krynica” надрукаваны лацінскім шрыфтам і кірыліцай. Інтэрфейс двухмоўны: інфармацыя прадстаўлена на беларускай і рускай мовах.
Мультымедыйны праект “Станаўленне беларускай дзяржаўнасці: па старонках беларускіх газет 1917–1922 гг.” разлічаны на навукоўцаў, выкладчыкаў, аспірантаў, магістрантаў, студэнтаў ВНУ, краязнаўцаў, а таксама на ўсіх зацікаўленых айчыннай гісторыяй.
На цэнтральным стэндзе таксама прадстаўлены іншыя праекты бібліятэкі: вэб-навігатар па беларусазнаўчых рэсурсах – “Беларусь у інфармацыйнай прасторы” і online-служба “Віртуальная чытальная зала Нацыянальнай бібліятэкі Беларусі”, якая забяспечвае аддалены доступ да электронных інфармацыйных рэсурсаў “алмаза ведаў”, сусветных вытворцаў і арганізацый-партнёраў. Тут жа можна даведацца больш пра партал Нацыянальнай бібліятэкі Беларусі, які ў мінулым годзе ўвайшоў у шорт-ліст міжнароднага конкурсу лічбавых інавацый ААН.
Наведаць выстаўку можна да 12 красавіка.
Тэлефон для даведак: (8 017) 293 28 81.
E-mail: pr@nlb.by
Матэрыял прадастаўлены аддзелам сувязей з грамадскасцю.
