Для карыстальнікаў Нацыянальнай бібліятэкі Беларусі і партнёраў па віртуальнай чытальнай зале адкрыты тэставы доступ да часопісаў брытанскага выдавецтва The Company of Biologists.
Асноўны напрамак дзейнасці навуковай арганізацыі The Company of Biologists – выданне рэцэнзуемых часопісаў па біялогіі, прадастаўленне грантаў маладым даследчыкам, падтрымка навукова-даследчыцкай супольнасці, садзейнічанне правядзенню навуковых канферэнцый і мерапрыемстваў.
Для тэставага доступу адкрыты пяць навуковых часопісаў.
Development публікуе вынікі даследаванняў працэсаў развіцця жывёл і раслін, асвятляе пытанні марфагенезу, арганагенезу, эвалюцыі арганізмаў, вывучэння ствалавых клетак. Development з’яўляецца вядучым часопісам у катэгорыі “Біялогія развіцця” базы даных Web of Science. Выданне ўваходзіць у першы квартыль і займае другое месца па колькасці цытаванняў сярод 42 часопісаў гэтай катэгорыі.
Journal of Cell Science публікуе перадавыя дасягненні навукі ў галіне клетачнай біялогіі.
The Journal of Experimental Biology з’яўляецца вядучым даследчым часопісам у галіне параўнальнай фізіялогіі і публікуе артыкулы пра форму і функцыянаванне жывых арганізмаў на ўсіх узроўнях біялагічнай арганізацыі.
Анлайн-часопіс Disease Models & Mechanisms прысвечаны выкарыстанню мадэльных сістэм для дыягностыкі і лячэння захворванняў чалавека.
У часопісе Biology Open публікуюцца рэцэнзуемыя вынікі даследаванняў па розных аспектах біялогіі, уключаючы клетачную навуку, біялогію развіцця і эксперыментальную біялогію.
Мова дакументаў – англійская.
Тэставы доступ адкрыты да 17 кастрычніка 2018 года
