Некалькі дзён таму наведвальнікі бібліятэкі заўважылі цікавы аб’ект у атрыуме другога паверха. Здагадкі, што хаваецца пад сіняй тканінай, былі самыя розныя. І вось сёння, 29 сакавіка, дзеці, якія прыйшлі да нас на экскурсію, даведаліся, што там таіўся сімвал II Еўрапейскіх гульняў – лісяня Лесік.
Падчас цырымоніі ўрачыстай прэзентацыі талісмана спартыўных спаборніцтваў, што пройдуць у Мінску 21–30 чэрвеня, дырэктар Нацыянальнай бібліятэкі Беларусі Р.С. Матульскі і маленькая прыгажуня Марыя ўпершыню паказалі школьнікам фігуру Лесіка. Выявы героя, які зрабіў мільён крокаў з планеты Маленькага прынца Антуана дэ Сент-Экзюперы да Беларусі, каб знайсці верных сяброў і папараць-кветку, сустракаюць гасцей на вуліцах сталіцы і ва ўстановах, рэкамендаваных для наведвання турыстамі.
Вялікую радасць у дзяцей і дарослых, якія прысутнічалі на мерапрыемстве, стала магчымасць зрабіць фотаздымкі каля Лесіка з “жывой” Нацыянальнай бібліятэкай і цікавымі хэштэгамі, далучыўшыся да слогана II Еўрапейскіх гульняў – “Час яскравых перамог”.
Лісяня будзе ўпрыгожваць бібліятэку да канца 2019 года, таму кожны жадаючы зможа зрабіць свае яркія здымкі. Тут жа хутка пачне дзейнічаць і выстаўка, прысвечаная спорту: атрыбутыку, формы розных гадоў, сімволіку, тэматычныя выданні і іншыя цікавыя экспанаты можна будзе паглядзець уладальнікам чытацкага білета або білета сацыякультурнага цэнтра. А вонкавае электроннае светлавое табло будзе радаваць мінчан і гасцей Мінска выявамі некаторых відаў спорту, прадстаўнікі якіх будуць змагацца за перамогу падчас спаборніцтваў у чэрвені гэтага года.
Матэрыял прадастаўлены аддзелам сувязей з грамадскасцю.
Глядзіце таксама: