24 студзеня ў бібліятэцы адбудзецца творчая сустрэча з лаўрэатамі спецыяльнай прэміі Прэзідэнта Рэспублікі Беларусь дзеячам культуры і мастацтва 2016 года.
Напярэдадні калядных свят Прэзідэнт Рэспублікі Беларусь Аляксандр Лукашэнка адзначыў высокімі ўзнагародамі беларусаў, якія ўнеслі значны ўклад у развіццё нацыянальнай культуры.
Добрай штогадовай традыцыяй стала ўшаноўванне лаўрэатаў у Нацыянальнай бібліятэцы Беларусі.
Сярод людзей, чые імёны прагучалі са сцэны Палаца Рэспублікі падчас урачыстай цырымоніі 10 студзеня 2017 года, – Раіса Раманеня. Больш за 30 гадоў яна кіруе студыяй дэкаратыўна-прыкладнога мастацтва “Беларускі сувенір” (Цэнтр творчасці дзяцей і моладзі Салігорскага раёна). Раіса Аляксандраўна адзначана прэміяй за значны ўклад у адраджэнне і захаванне традыцый народнага мастацтва саломапляцення, прылучэнне моладзі да нацыянальнай культуры.
Госці мерапрыемства змогуць пазнаёміцца з калектывам Дзіцячай музычнай школы мастацтваў № 10 імя Яўгена Глебава г. Мінска, які таксама стаў уладальнікам прэстыжнай прэміі. Высокай узнагародай адзначаны значны ўклад, які ўносяць супрацоўнікі ўстановы ў захаванне і развіццё нацыянальнай культуры і музычнага мастацтва.
Творчая сустрэча пачнецца а 16-й гадзіне ў галерэі “Ракурс” бібліятэкі (2-гі паверх).
Нацыянальная бібліятэка Беларусі прадставіць кніжна-ілюстрацыйную выстаўку “Вялікі талент, вялікая праца, вялікае сэрца”. У экспазіцыю ўвойдуць кнігі, каталогі, буклеты, артыкулы з перыядычных выданняў, выяўленчыя матэрыялы з фондаў бібліятэкі – усё пра лаўрэатаў 2016 года!
Выстаўка будзе размешчана да 28 лютага 2017 года на 2-м паверсе кальцавога калідора бібліятэкі.
Тэлефоны для даведак: (8 017) 293 27 56, 293 79 80.
Е-mail: pr@nlb.by