3 мая 2009 года дзіцячы пакой Нацыянальнай бібліятэкі Беларусі запрашае дзяцей разам з бацькамі на святочнае мерапрыемства, прысвечанае Дню Перамогі, “Вайна і песня!”.
Дзеці прымуць удзел у цікавых конкурсах, пазнаёмяцца з песнямі ваенных гадоў, патанцуюць пад вясёлую музыку, зробяць падарункі сваімі рукамі.
У конкурсе “Плавае-лётае” дзеці праявяць уважлівасць, кемлівасць і каардынацыю рухаў. Знаўцамі розных відаў войскаў яны змогуць паказаць сябе ў конкурсе “Назаві войска”, а вось спрыт і хуткасць рэакцыі спатрэбяцца ўдзельнікам конкурсаў “Танкісты” і “Збяры кветкі”.
На працягу ўсяго свята будуць гучаць песні ваенных гадоў: “Священная война”, “День Победы”, “Три танкиста”, што дапаможа адчуць дух ваеннага часу. У танцы “Маракі” маленькія ўдзельнікі ператворацца ва ўдалых маракоў, якія ўмеюць не толькі мыць палубу, лазіць па канаце, але і добра танцаваць.
Якое ж свята без сюрпрызаў? Дзецям прапануюць зрабіць аплікацыю “Святочны салют”, якая стане сімвалам Перамогі.
Час правядзення: 12.00–13.00.
Запрашаюцца дзеці ва ўзросце 6–10 гадоў.