22 кастрычніка ў рамках VII Міжнароднага кангрэса “Бібліятэка як феномен культуры” Віктар Пшыбытка правёў анлайн майстар-клас “Выкарыстанне свабоднага праграмнага забеспячэння для стварэння краязнаўчых рэсурсаў бібліятэк”.
Фарміраванне ЭІР краязнаўчай накіраванасці з’яўляецца важнай часткай бібліятэчнай дзейнасці і перспектыўнай формай распаўсюджвання і захавання сацыяльнай памяці рэгіёна.
Адно з надзённых пытанняў – выбар праграмнай платформы. Выкарыстанне прапрыетарнага прыкладнога праграмнага забеспячэння (ППЗ), спецыяльна распрацаванага для фарміравання электронных рэсурсаў, з’яўляецца дарагім як з пункту гледжання распрацоўкі, так і далейшага суправаджэння.
Сусветны вопыт паказвае, што выкарыстанне свабоднага праграмнага забеспячэння з’яўляецца альтэрнатыўным і малазатратным варыянтам у забеспячэнні аддаленага доступу да бібліятэчных калекцый. Сёння гэты метад распрацоўкі найбольш папулярны.
Удзельнікі майстар-класа (больш за 150 спецыялістаў з 40 бібліятэк Беларусі) азнаёміліся з трыма бясплатнымі платформамі, якія можна выкарыстоўваць для стварэння краязнаўчых электронных інфармацыйных рэсурсаў. На прыкладзе анлайн рэсурсу Нацыянальнай бібліятэкі Беларусі “Рукапісы сучасных беларускіх аўтараў з фондаў Нацыянальнай бібліятэкі Беларусі” былі прадэманстраваны магчымасці свабоднага праграмнага забеспячэння “Omeka”.
Матэрыял пададзены цэнтрам алічбоўкі і забеспячэння захаванасці бібліятэчных дакументаў.