Нацыянальная бібліятэка Беларусі віншуе аўтараў і чытачоў з Сусветным днём кнігі і аўтарскага права, Міжнародным днём інтэлектуальнай уласнасці, якія адзначаюцца 23 і 26 красавіка.
Напярэдадні свят, пачынаючы з 2007 года, Нацыянальная бібліятэка Беларусі пры ўдзеле Нацыянальнага цэнтра інтэлектуальнай уласнасці і Нацыянальнага цэнтра заканадаўства і прававых даследаванняў Рэспублікі Беларусь праводзіць семінары, круглыя сталы і культурна-асветніцкія акцыі, прысвечаныя пытанням аўтарскага права і інтэлектуальнай уласнасці. Больш за 1 000 бібліятэчных спецыялістаў змаглі атрымаць прафесійныя адказы на пытанні прымянення норм аўтарскага права.
Удзельнікі штогадовых культурна-асветніцкіх акцый “Майстры беларускай культуры” перадалі ў бібліятэку невыключныя правы на ўнікальныя музычныя і літаратурныя творы Анатоля Багатырова, Яўгена Глебава, Аляксея Дударава, Уладзіміра Кандрусевіча, Кандрата Крапівы, Ігара Алоўнікава. Нацыянальная бібліятэка высока цэніць такое праяўленне добрай волі кампазітараў, пісьменнікаў і мастакоў, дзякуе таксама рэдакцыі часопісаў і газет, інфармацыйным агенцтвам, якія перадаюць копіі выданняў для фарміравання “Электроннага архіва нацыянальнай перыёдыкі”, аўтарам дысертацыйных даследаванняў, якія папаўняюць “Электронную бібліятэку дысертацый і аўтарэфератаў дысертацый НББ”.
Запланаваныя ў красавіку 2020 г. семінар “Аўтарскае права ў Рэспубліцы Беларусь: удасканаленне норм закона з улікам практыкі яго прымянення” і культурна-асветніцкая акцыя з удзелам вядомага беларускага пісьменніка, старшыні праўлення Саюза пісьменнікаў Беларусі Мікалая Чаргінца пераносяцца на больш позні час.
Звярніце ўвагу на новы раздзел нашага партала “Пытанні аўтарскага права”, дзе сабраны найбольш актуальныя матэрыялы пра змены ў Законе Рэспублікі Беларусь “Аб аўтарскім праве і сумежных правах”. Мы спадзяёмся, што гэта будзе спрыяць інфармацыйнаму забеспячэнню адпаведнага напрамку работы бібліятэк і часткова кампенсуе адсутнасць запланаванага семінара.
Матэрыял прадастаўлены аддзелам фарміравання электроннай бібліятэкі.
