10 лютага ў “Клубе кніжных прафесараў” адбыліся ўнікальныя заняткі з сусветна вядомым кніжным мастаком Паўлам Татарнікавым.
Павел Татарнікаў ілюстраваў кнігі Ніла Гілевіча, Генадзя Бураўкіна, Уладзіміра Арлова, Уладзіміра Ягоўдзіка, Анатоля Бутэвіча, Алеся Краўцэвіча, беларускія народныя казкі, а таксама творы Шэкспіра, Дзюма, Андэрсана, кітайскі эпас. Беларускі графік – лаўрэат прэстыжных міжнародных прэмій, двойчы стаў уладальнікам найвышэйшай еўрапейскай узнагароды для кніжных ілюстратараў – прэміі “Залаты яблык” Браціслаўскага біенале.
Дамовіцца аб сустрэчы з мастаком было складана: праца ў майстэрні, замежныя камандзіроўкі, заняткі ў Акадэміі мастацтваў, адкрыццё выстаўкі ў Нацыянальным гісторыка-культурным музеі-запаведніку “Нясвіж”… Але ён знайшоў час, каб прыйсці ў бібліятэку і, акружаны ўвагай шматлікіх дзетак і бацькоў, расказаць пра гісторыю кнігі, кніжную графіку, арт-кнігу і пра сваю любоў да кніг з дзяцінства.
Праграма сустрэчы была насычаная:
- экскурсія па выстаўцы “Pencil & пэндзаль”, дзе прадстаўлены графічныя ілюстрацыі Паўла Татарнікава да папулярных выданняў;
- кніжная выстаўка выданняў з яго ілюстрацыямі з фондаў бібліятэкі;
- прэс-канферэнцыя, падчас якой мастак адказаў на ўсе пытанні юных “прафесараў-кнігазнаўцаў”;
- майстар клас па стварэнні арт-кнігі;
- аўтограф-сесія, падчас якой дзеткі атрымалі на памяць ад мастака не толькі аўтограф, але і малюнак.
Творы Паўла Татарнікава знаходзяцца ў зборах музеяў Беларусі, Германіі, Славакіі, Іспаніі, Японіі і іншых краін, а выстаўкі яго работ аб’ехалі амаль паўсвету. На выстаўцы “Pencil & пэндзаль” у Нацыянальнай бібліятэцы Беларусі дзеці разглядалі карціны мастака і разам з ім здзяйснялі падарожжа ў часе. Тэхнічнае майстэрства, віртуознае валоданне акварэллю захоплівалі, а мноства дэталяў прыцягвалі да пільнага ўглядання ў кожны твор. Мастак дапамагаў разумець карціны і звяртаў увагу на іх асаблівасці. Напрыклад, у ілюстрацыі да казкі “Снежная каралева” Андэрсана карэта пралятае каля мініяцюрнага палаца, які нагадвае Ружанскі палац у Беларусі.
Удзельнікі сустрэчы задавалі шмат пытанняў мастаку. Асабліва дзеткам спадабалася, што Павел з дзяцінства любіў, каб кніжкі былі прыгожыя, і часам сам дамалёўваў ілюстрацыі на старонках кніг з уласнай бібліятэкі.
Шматлікія ўдзельнікі заняткаў прынеслі для аўтографаў кнігі “Айчына: маляўнічая гісторыя. Ад Рагнеды да Касцюшкі” і “Залатая шарсцінка, срэбраная павуцінка: беларускія народныя казкі”. Ілюстрацыі з гэтых кніг яны ўбачылі на выстаўцы “Pencil & пэндзаль”, у тым ліку партрэт Францыска Скарыны.
Вынікам майстар-класа стала арт-кніга ў адзіным экзэмпляры пад назвай “Кніжка-пажаданка”, якую мастак прысвяціў “Клубу кніжных прафесараў”.
Матэрыял прадастаўлены навукова-даследчым аддзелам кнігазнаўства.