27 лютага Нацыянальнай бібліятэкай Беларусі і Беларускай рэспубліканскай калегіяй адвакатаў у рамках мерапрыемстваў па інфармацыйна-прававой асвеце грамадзян была арганізавана і праведзена штомесячная тэматычная сустрэча з адвакатам “Жыць як усе: пра правы і льготы для інвалідаў”.
З лекцыяй выступіла адвакат Мінскай абласной калегіі адвакатаў Зарына Юр’еўна Залеўская.
На сустрэчы былі падрабязна асветлены прававыя пытанні ў рамках дзеючага заканадаўства Рэспублікі Беларусь, звязаныя з прадастаўленнем ільгот людзям з абмежаванымі магчымасцямі; прававой абаронай сем’яў, якія выхоўваюць дзяцей-інвалідаў; ільготамі для наймальнікаў пры працаўладкаванні інвалідаў; аплатай працы гэтай катэгорыі грамадзян, а таксама іншыя пытанні па дадзенай тэме, якая выклікала ажыўленую дыскусію ў аўдыторыі. Карыстальнікі бібліятэкі змаглі задаць і атрымаць кампетэнтныя і падрабязныя адказы спецыяліста на шматлікія пытанні.
У рамках мерапрыемства ў зале прававой інфармацыі (пам. 207b) экспануецца тэматычная выстаўка літаратуры з фондаў Нацыянальнай бібліятэкі Беларусі.
Матэрыял прадастаўлены аддзелам абслугоўвання афіцыйнымі дакументамі.