1 снежня ў Нацыянальнай бібліятэцы Беларусі адбылася сустрэча Прэзідэнта Рэспублікі Беларусь Аляксандра Рыгоравіча Лукашэнкі з творчай моладдзю.
Сярод удзельнікаў сустрэчы – маладыя спевакі і музыканты, архітэктары і дызайнеры, мадэльеры і скульптары. Практычна ўсе яны з'яўляюцца стыпендыятамі і лаўрэатамі спецыяльнага фонду Прэзідэнта па падтрымцы таленавітай моладзі. Сёння лаўрэатамі і стыпендыятамі гэтага фонду, створанага 15 гадоў назад, сталі амаль 2 тысячы маладых людзей.
Стварыць умовы для прафесійнага станаўлення адораных асоб, павысіць іх сацыяльную абароненасць таксама дазволіла рэалізацыя дзяржпраграмы “Маладыя таленты Беларусі” на 2006–2010 гады. У адпаведнасці з ёй былі прыняты меры па ўзмацненні сацыяльнай абароненасці таленавітай моладзі. У прыватнасці, заснаваны 100 стыпендый кіраўніка дзяржавы для аспірантаў і 200 – для студэнтаў.
Аляксандр Лукашэнка заявіў, што дзяржава і далей будзе падтрымліваць таленавітых маладых людзей, аднак адзначыў, што ў сучасным грамадстве, акрамя творчых здольнасцей, яшчэ патрэбна ініцыятыва, энергія і прадпрымальнасць.
Да пачатку сустрэчы ў холе канферэнц-залы бібліятэкі кіраўнік дзяржавы наведаў выстаўку, на якой прадстаўлены творчыя работы маладых аўтараў – мастацкія і скульптурныя работы, адзенне, выкананае маладымі беларускімі мадэльерамі, архітэктурныя праекты, вырабы з керамікі, металу і шкла, літаратурныя творы.