17 снежня ў Нацыянальнай бібліятэцы Беларусі адбылася сустрэча прадстаўнікоў Міністэрства культуры Рэспублікі Беларусь і Міністэрства культуры і нацыянальнай спадчыны Рэспублікі Польшча.
У ходзе двухбаковых перамоў былі абмеркаваны пытанні беларуска-польскага супрацоўніцтва ў галіне культуры, перспектывы і крокі яго далейшага развіцця.
Па выніках перамоў прайшла прэс-канферэнцыя з удзелам міністра культуры Рэспублікі Беларусь Паўла Латушкі і міністра культуры і нацыянальнай спадчыны Рэспублікі Польшча Богдана Здраеўскага з нагоды святкавання 200-годдзя з дня нараджэння Фрэдэрыка Шапэна.
У наступным годзе Беларусь, як і многія краіны свету, будзе шырока адзначаць гэту дату. У рамках свята плануецца комплекс мерапрыемстваў: канцэрты, пастаноўка оперы, прысваенне Мінскай школе мастацтваў № 3 імені Фрэдэрыка Шапэна.
Для прадстаўнікоў польскай дэлегацыі была арганізавана экскурсія па Нацыянальнай бібліятэцы Беларусі, падчас якой госці пазнаёміліся з яе тэхнічным аснашчэннем і архітэктурна-канструкцыйнымі асаблівасцямі будынка. У музеі кнігі ўвазе гасцей была прадстаўлена калекцыя рарытэтаў з фондаў бібліятэкі.
 |
 |
 |
 |
 |
