Дзякуючы праекту Еўрапейскага Саюза MOST з 3 па 9 лістапада 2019 г. супрацоўнікі бібліятэкі (Святлана Пугачова, Наталля Зелянеўская, Нэлі Кавалеўская) і Аб’яднанага інстытута праблем інфарматыкі Нацыянальнай акадэміі навук Беларусі (Юрый і Святлана Гецэвічы) наведалі вядучыя бібліятэкі Каралеўства Нідэрланды.
Сярод бібліятэк, выбраных для візіту, былі Каралеўская нацыянальная бібліятэка Нідэрландаў (Гаага), Бібліятэка Універсітэта імя Эразма Ратэрдамскага (Ратэрдам), галоўная бібліятэка Лейдэнскага ўніверсітэта (Лейдэн). Спецыялісты азнаёміліся з арганізацыяй працы, вывучылі тэхналогію камплектавання і каталагізацыі, падыходы да стварэння розных інфармацыйных рэсурсаў, асаблівасці абслугоўвання карыстальнікаў.
Важным этапам прафесійнай паездкі была сустрэча з галоўным рэдактарам міжнароднай бібліятэчна-бібліяграфічнай класіфікацыйнай сістэмы Універсальная дзесятковая класіфікацыя (УДК) доктарам Аідай Славік у Кансорцыуме УДК (UDCC) (Гаага). Падчас сустрэчы адбылося абмеркаванне прапаноў Нацыянальнай бібліятэкі Беларусі пра змены і дапаўненні ў беларускім выданні УДК, адлюстраванне іх у базе даных Кансорцыума УДК (UDC Master Reference File), а таксама пытанняў па далейшым перакладзе сістэмы на беларускую мову.
Памятнай падзеяй для беларускіх спецыялістаў таксама стала наведванне архіва Кансорцыума УДК і Міжнароднай федэрацыі па дакументацыі (FID, Federation internationale de documentation), дзе захоўваюцца важныя архіўныя матэрыялы гэтых арганізацый і ўсе выданні УДК, уключаючы самае першае выданне поўных табліц УДК на французскай мове, апублікаванае ў Брусэлі ў 1905 годзе.
Падчас паездкі былі ўсталяваны новыя прафесійныя кантакты, дасягнута дамоўленасць аб візіце галоўнага рэдактара УДК у Беларусь у 2020 годзе.
Матэрыял прадастаўлены аддзелам індэксавання дакументаў.
