25–26 лютага супрацоўнікі Нацыянальнай бібліятэкі Беларусі ўзялі ўдзел у міжнародным семінары “Сучасныя тэхналогіі алічбоўкі інфармацыі і іх выкарыстанне ва Украіне”.
Мерапрыемства, арганізаванае Інстытутам Гётэ і Украінскай бібліятэчнай асацыяцыяй, праходзіла ў Кіеве, на базе Інстытута Гётэ.
Сваім вопытам работы падзяліліся нямецкія і ўкраінскія эксперты: Анке Верэна Маер-Гес (Нямецкая нацыянальная бібліятэка); Андрэ Гоман (Бібліятэка Федэральнай зямлі Саксонія – Дрэздэнская дзяржаўная ўніверсітэцкая бібліятэка); Аляксей Васільеў (асацыяцыя “Інфармацыя-Кансорцыум”, Украіна); Таццяна Бяляева (кампанія “Электронныя архівы Украіны”).
Нацыянальную бібліятэку Беларусі прадстаўлялі намеснік дырэктара па інфармацыйных рэсурсах Таццяна Кузьмініч і загадчыца сектара аддзела фарміравання электроннай бібліятэкі Людміла Парфіновіч.
На семінары былі прадстаўлены даклады і прэзентацыі па пытаннях канцэптуальных падыходаў да алічбоўкі бібліятэчных фондаў з мэтай стварэння рэжыму свабоднага доступу да сусветнай культурнай спадчыны, тэхналогіі арганізацыі рабочых працэсаў па дыгіталізацыі бібліятэчных дакументаў і інш.; прапанаваны прыклады першаснай і дадатковай (паўторнай) апрацоўкі даных, спосабы размяшчэння электронных рэсурсаў для свабоднага (публічнага) выкарыстанні і інш.
Значная ўвага была нададзена асаблівасцям работы нямецкіх і ўкраінскіх бібліятэк па абароне праў на інтэлектуальную ўласнасць у кантэксце алічбоўкі дакументаў, стварэння і распаўсюджвання іх лічбавых аналагаў.
Кампаніяй “Электронныя архівы Украіны” былі шырока прадстаўлены паслугі, прапанаваныя / аказваемыя бібліятэкам па алічбоўцы картачных каталогаў, стварэнні лічбавых аналагаў розных друкаваных выданняў.
