Вы ўжо наведалі выставу, якая праходзіць у Нацыянальнай бібліятэцы і мае інтрыгуючую назву “Бляск убораў і таямніцы флірту”? Не?! Тады тэрмінова да нас! Да таго ж наведаць выставу стала яшчэ прасцей з увядзеннем QR-кодаў, якія дазваляюць аплаціць квіток адразу на месцы.
Нядаўна ў нас адбылося невялікае папаўненне экспазіцыі.
Вам што-небудзь кажа слова “сцярлядкі”? Для дам, якія наведвалі балі некалькі стагоддзяў таму, гэта было звыклае слова. “Сцярлядкамі” з-за вузкай формы ў эпоху ранняга ампіру называлі балеткі. Гэты асаблівы від абутку дазваляў модніцам таго часу кружыцца ў танцах усю ноч. Доўгімі шаўковымі стужкамі балеткі шнураваліся крыж-накрыж уверх па галёнцы і завязваліся на бант. За адзін баль прыгажуні маглі станцаваць да дзір не адну пару, таму на вялікія балі бралі па некалькі пар такога абутку.
На нашай выставе прадстаўлены “сцярлядкі” з чорнага саціну і найтанчэйшай скуры, пашытыя ў пачатку XIX стагоддзя вядомым майстрам з Лондана, абутковым чараўніком Шэнкам Джонам Тэадорам – эксклюзіўным пастаўшчыком танцавальнага абутку для другой жонкі імператара Напалеона I Марыі-Луізы Аўстрыйскай.
Чакаем вас на выставе “Бляск убораў і таямніцы флірту”!
Матэрыял пададзены аддзелам галерэйна-выставачнай дзейнасці.
