6 верасня ў рамках міжнароднага навукова-практычнага семінара “Страчаныя і перамешчаныя культурныя каштоўнасці: беларускі кантэкст” у бібліятэцы прайшоў круглы стол, прысвечаны праблемам страты і перамяшчэння кніжных калекцый.
У рабоце круглага стала з выступленнямі прынялі ўдзел Патрыцыя Кенэдзі Грымстэд, доктар гістарычных навук Гарвардскага ўніверсітэта (ЗША), Уэслі А. Фішар, дырэктар даследчага аддзела “Клеймс Конферэнс” (ЗША), Марцін Пулэн, доктар сацыялогіі, бібліёграф (Францыя), Мішэль Вермот, архівіст, гісторык (Бельгія). Мадэратарам круглага стала з’яўляўся Анатоль Сцебурака, кандыдат гістарычных навук, дацэнт, які працуе на кафедры бізнес-камунікацый Інстытута бізнесу і менеджменту тэхналогій Беларускага дзяржаўнага ўніверсітэта.
На пасяджэнні з дакладамі і прэзентацыямі выступілі намеснік дырэктара па навуковай рабоце і выдавецкай дзейнасці Нацыянальнай бібліятэкі Беларусі, кандыдат культуралогіі Аляксандр Суша (“Лёс кнігі: перамешчаныя кніжныя каштоўнасці ў гісторыі культуры Беларусі”), загадчык навукова-даследчага аддзела кнігазнаўства Галіна Кірэева (“Книги из Русской Тургеневской библиотеки в Париже по фондам Национальной библиотеки Беларуси”), заслужаны дзеяч культуры Беларусі Таццяна Рошчына (“Перемещенные исторические книжные коллекции: исследование провененций”), прафесар Мінскага дзяржаўнага лінгвістычнага ўніверсітэта, доктар філалагічных навук Уладзімір Макараў (“Идентификация владельцев библиотек”).
Дакладчыкі абмеркавалі праблемы страчаных і перамешчаных беларускіх і еўрапейскіх кніжных помнікаў і калекцый, а таксама магчымасцей для вывучэння беларускіх кніг у бібліятэках, музеях, архівах іншых краін. На працягу сваёй гісторыі Беларусь страціла вялікую частку дакументальнай спадчыны. Загінулі або былі распылены ўнікальныя прыватныя калекцыі, манастырскія і грамадскія бібліятэкі. Найбольш рэдкія кніжныя помнікі, фрагменты былых беларускіх бібліятэк, часам даволі вялікія комплексы, якія па месцы стварэння або па прыналежнасці адносяцца да Беларусі і дагэтуль малавывучаны, захоўваюцца ў шматлікіх бібліятэках Літвы, Польшчы, Расіі, Украіны, іншых краін Еўропы. Самы рэальны шлях вяртання страчанага – іх выяўленне і сумеснае выкарыстанне.