З 13 лютага да ўвагі карыстальнікаў прадстаўлена пастаянная віртуальная выстаўка “Споведзь мужнасці і любові”, прысвечаная 95-годдзю з дня нараджэння народнага мастака Беларусі Міхаіла Андрэевіча Савіцкага.
Чалавек тытанічнай працаздольнасці, сілы волі, несумненнага таленту, апантанай адданасці мастацтву, Міхаіл Савіцкі (1922–2010) – адзін з выдатных беларускіх жывапісцаў, прадстаўнік кірунку “суровы стыль”. Былы вязень Бухенвальда і Дахау, які перажыў жахі вайны, мастак ярка, эмацыянальна і вобразна прадставіў усе перанесеныя пакуты, усю трагічную праўду жыцця ў сваіх палотнах. Ствараючы ў вышэйшай ступені праўдзівыя, парой страшныя вобразы, ён усё роўна аперыраваў сродкамі прыгожага.
Шматгранная асоба, Міхаіл Савіцкі быў разнастайны і ў творчасці. Яго пэндзлю належаць работы, прысвечаныя біблейскай тэматыцы, жаночым вобразам і мацярынству, чалавечай працы, ураджаю і хлебу. Таксама мастаком створаны шэраг партрэтаў дзеячаў культуры і мастацтва Беларусі.
Віртуальная экспазіцыя “Споведзь мужнасці і любові” пазнаёміць з кароткай біяграфіяй М. Савіцкага; яго асноўнымі работамі, у тым ліку – уражальнай і незабыўнай серыяй карцін “Лічбы на сэрцы”; кнігамі і артыкуламі пра жыццё і творчасць мастака; ілюстрацыямі Міхаіла Андрэевіча да дзіцячых кніг. Дапаўняюць выстаўку шматлікія фатаграфіі.
Пры наведванні бібліятэкі кансультацыю па пошуку і заказе неабходных выданняў акажуць супрацоўнікі залы дакументаў па мастацтве (пам. 306).
Кантактны тэлефон: (8 017) 293 27 53.
Чытайце таксама пра іншыя віртуальныя выстаўкі бібліятэкі: