9 снежня ў галерэі “Лабірынт” адбылося ўрачыстае адкрыццё выстаўкі і прэзентацыя электроннага выдання “Спадчына акадэміка Яўхіма Карскага: да 150-годдзя з дня нараджэння”.
У экспазіцыю ўвайшлі ўнікальныя выданні з асабістага кніжнага збору акадэміка. Гэты збор з 1922 г. асобнай калекцыяй захоўваецца ў Нацыянальнай бібліятэцы Беларусі. Калекцыя налічвае каля 2,5 тысяч экзэмпляраў і з’яўляецца каштоўным гістарычным зборам літаратуры па славяназнаўстве. Унікальныя дакументы, сярод якіх фатаграфіі, біяграфічныя матэрыялы, запісныя кніжкі з праўкамі і ўстаўкамі аўтара, прадставіў для выстаўкі Санкт-Пецярбургскі філіял Архіва Расійскай акадэміі навук.
Электроннае выданне “Спадчына акадэміка Яўхіма Карскага: да 150-годдзя з дня нараджэння” ўключае біяграфічны нарыс, дакументы з беларускіх архіваў, каталог кніг з аўтографамі, электронныя копіі асобных прыжыццёвых выданняў Карскага. Праўнук акадэміка падрыхтаваў для дыска бібліяграфію навуковых работ Карскага і літаратуры пра яго, апісанне эпісталярнай спадчыны акадэміка.
У адкрыцці выстаўкі ўзялі ўдзел намеснік дырэктара па навуковай рабоце і сувязях з грамадскасцю Нацыянальнай бібліятэкі Беларусі Людміла Кірухіна; начальнік аддзела навуковага выкарыстання дакументаў і інфармацыі Дэпартамента па архівах і справаводству Міністэрства юстыцыі Рэспублікі Беларусь Уладзімір Крук; вучоны сакратар Санкт-Пецярбургскага філіяла Архіва Расійскай акадэміі навук Ларыса Бондар; праўнук акадэміка, гісторык, архівіст, пісьменнік Аляксандр Карскі; загадчык аддзела публікацый Нацыянальнага архіва Рэспублікі Беларусь Віталь Скалабан, загадчыца сектара захоўвання фондаў навукова-даследчага аддзела кнігазнаўства Нацыянальнай бібліятэкі Беларусі Ксенія Суша.
Выстаўка будзе доўжыцца па 15 студзеня 2011 г. у музеі кнігі Нацыянальнай бібліятэкі Беларусі.
Інфармацыйныя выданні Нацыянальнай бібліятэкі Беларусі можна набыць па падпісцы або купіць у кіёску бібліятэкі, размешчаным на 1-м паверсе каля галоўнага ўвахода.
 |
 |
 |
 |
 |
 |
 |
