Адзначыць Міжнародны дзень роднай мовы экскурсіяй у Нацыянальнай бібліятэцы сёлета вырашылі навучэнцы 4 класа сярэдняй школы № 92 г. Мінска.
Яны завіталі на экскурсію “Славутыя імёны Бацькаўшчыны” па тэме “Жыццё і творчасць Янкі Купалы і Якуба Коласа”.
Навучэнцы пазнаёміліся з архітэктурай, мастацкім афармленнем бібліятэкі, сістэмай заказу, дастаўкі і выдачы літаратуры, наведалі музей кнігі.
Частка экскурсіі прайшла ў выглядзе інтэрактыўных заняткаў, падчас якіх госці даведаліся пра цікавыя факты з біяграфіі славутых землякоў. Замацаванне ведаў адбылося падчас спаборніцтва. Вучні падзяліліся на каманды “Янка Купала” і “Якуб Колас” і паспаборнічалі ў інтэрактыўнай віктарыне “Хто ёсць хто”, у складанні пазлаў з ілюстрацыямі да твораў пісьменнікаў і чытанні вершаў беларускіх класікаў. У выніку, перамагла дружба: абедзве каманды выдатна справіліся з выпрабаваннямі і набралі аднолькавую колькасць балаў.
У канцы экскурсіі вучні падняліся на аглядную пляцоўку, каб убачыць краявіды з вышыні птушынага палёту.
Азнаёміцца са спісам экскурсій цыкла “Славутыя імёны Бацькаўшчыны” можна на нашым сайце, атрымаць дадатковую інфармацыю – па тэлефонах: (8 017) 293 29 66, 293 28 53.
Матэрыял пададзены аддзелам экскурсійна-метадычнай работы.