22 студзеня а 17-й гадзіне ў галерэі “Ракурс” адбудзецца ўрачыстае адкрыццё рэспубліканскай выстаўкі тэкстыльнай скульптуры “Снежнае лета”.
Аўтарам і куратарам выстаўкі з’яўляецца заснавальнік першай некамерцыйнай беларускай галерэі “Брама”, мастацтвазнаўца Ларыса Фінкельштэйн.
Экспазіцыя створана па выніках трэцяга рэспубліканскага пленэра тэкстыльнай скульптуры, арганізаванага галерэяй "Брама" ў 2014 годзе ў жывапісным кутку Смалявіцкага раёна. Тэма пленэра – “Снежнае лета” – вызначыла белы колер усіх твораў.
У праекце задзейнічаны шырокі дыяпазон тэхнік, матэрыялаў, стылістык. У ім прымаюць удзел як знакамітыя майстры (лаўрэат Дзяржаўнай прэміі Беларусі Ніна Пілюзіна, прафесар БДАМ Яўген Шунейка), так і цяперашнія студэнты “тэкстыльных” кафедраў вышэйшых навучальных устаноў Віцебска (Аляксандра Захарава) і Мінска (Хрысціна Высоцкая, Віка Ярэміч і Анастасія Пухоўская), а таксама нязменныя ўдзельнікі трох пленэраў, сярод якіх – педагогі мастацкіх навучальных устаноў, кіраўнікі дзіцячых студый (Вераніка Багачова, Марыя Барысенка, Вольга Данілюк і Аляксандра Гірас).
Тэлефоны для даведак: (8 017) 293 27 56, 293 28 33.
Е-mail: pr@nlb.by