15 снежня ў бібліятэцы адбудзецца прэзентацыя мультымедыйнага рэсурсу “Служыць Радзіме: да 250-годдзя з дня нараджэння Міхала Клеафаса Агінскага” і кнігі Л.М. Несцерчука “Міхал Клеафас Агінскі: Ліцвін, Патрыёт, Творца”.
Юбілей аўтара сусветна вядомага паланэза "Развітанне з Радзімай" па ініцыятыве Беларусі, Літвы і Польшчы быў уключаны ў Каляндар памятных дат ЮНЕСКА на 2015 год. На працягу года толькі ў Беларусі адбылося звыш ста рознага кшталту юбілейных мерапрыемстваў: канцэртаў, выставак, пленэраў, навуковых канферэнцый.
Стварыўшы электронны рэсурс "Служыць Радзіме…", Нацыянальная бібліятэка Беларусі ўнесла свой уклад у святкаванне юбілею і папулярызацыю асобы і творчай спадчыны Міхала Клеафаса Агінскага.
Рэсурс змяшчае вялікі аб’ём бібліяграфічнай і фактаграфічнай інфармацыі, гуказапісы твораў кампазітара, алічбаваныя копіі прыжыццёвых нотных выданняў, а таксама парыжскага выдання яго мемуараў на французскай мове і ў перакладзе на польскую мову з фондаў Нацыянальнай бібліятэкі, некаторых архіўных дакументаў, прадастаўленых Дзяржаўным музеем гісторыі тэатральнай і музычнай культуры Рэспублікі Беларусь.
Навукова-папулярнае выданне Л.М. Несцерчука “Міхал Клеафас Агінскі: Ліцвін, Патрыёт, Творца” прысвечана жыццю і дзейнасці знакамітага кампазітара, мемуарыста дыпламата, патрыёта і змагара за Бацькаўшчыну, адраджэнню, вяртанню і папулярызацыі яго матэрыяльнай і духоўнай спадчыны.
Электроннае выданне і кніга будуць цікавымі выкладчыкам гісторыі і архітэктуры, музыкі і мастацтва, студэнтам ВНУ і навучэнцам сярэдне-спецыяльных навучальных устаноў, мастацтвазнаўцам, спецыялістам па ахове гісторыка-культурнай спадчыны, айчынным і замежным турыстам і гасцям Беларусі.
Прэзентацыя пачнецца а 16-й гадзіне ў галерэі “Лабірынт” (3-ці паверх).
Тэлефоны для даведак: (8 017) 293 27 19, 293 29 80.
Е-mail: pr@nlb.by
