5 мая ў бібліятэцы адбудзецца прэзентацыя культурна-асветніцкага праекта “Славім вялікі подзвіг”, прысвечанага 70-годдзю Вялікай Перамогі.
У рамках праекта пройдзе выстаўка ваеннага плаката з фондаў Нацыянальнай бібліятэкі, прэзентацыя інтэрнет-праекта “Памяць палаючых гадоў”, выстаўка “Партызанскі і падпольны друк”, прэзентацыя выдання “Моя война. Великая Отечественная война в фотографиях В.И. Аркашева”, а таксама фотавыстаўка “Вялікая Айчынная вайна ў здымках фотакарэспандэнта БелТА і ТАСС Уладзіміра Навумавіча Лупейкі”.
Выстаўка ваеннага плаката аформлена ў галерэі “Атрыум” (3-ці паверх), дзе прадстаўлена каля 50 друкаваных арыгінальных плакатаў рознага фармату франтавой, тылавой, акупацыйнай і партызанскай тэматыкі; плакаты з шырока вядомай у гады Вялікай Айчыннай вайны серыі “Окна ТАСС” і іншых перыядычных серый. Храналагічна яны ахопліваюць падзеі ад чэрвеня 1941 г. да верасня 1945 г. Працавалі над імі вядомыя майстры савецкай плакатнай графікі – М. Смірноў, М. Мальцаў, М. Гардон, М. Сакалоў, В. Іваноў, В. Дэні, В. Карэцкі, Л. Галаванаў і інш.
Усяго ў сховішчах Нацыянальнай бібліятэкі налічваецца каля 200 плакатных лістоў 1941–1945 гг. выдання. Гэта гістарычны дакументальны скарб, які нясе на сабе подых эпохі, подых Вялікай Перамогі.
Да 70-годдзя Вялікай Перамогі бібліятэка падрыхтавала юбілейны інтэрнэт-праект “Памяць палаючых гадоў”, у якім прадстаўлены электронныя копіі газет, лістовак, кішэнных выданняў і рукапісных матэрыялаў, насценгазет, фатаграфій 1941–1945 гг., плакаты, творы ваеннай тэматыкі беларускіх аўтараў, запісы песень ваеннага і пасляваеннага часу.
Выстаўка “Партызанскі і падпольны друк Беларусі” будзе адкрыта ў музеі кнігі (3-ці паверх). Калекцыя падпольнага і партызанскага друку часоў Вялікай Айчыннай вайны з’яўляецца адной з найбольш каштоўных частак фонду Нацыянальнай бібліятэкі Беларусі. На выстаўцы будуць прадстаўлены выданні на беларускай і рускай мовах. Сярод іх унікальныя, створаныя ў партызанскіх атрадах, самаробныя рукапісныя і машынапісныя часопісы; лістоўкі з заклікамі аказваць дапамогу і падтрымку партызанам, весці актыўную барацьбу ў тыле ворага, не выконваць загадаў і распараджэнняў акупацыйных улад; выпускі рэдкіх газет.
Альбом “Моя война. Великая Отечественная война в фотографиях В.И. Аркашева” выйшаў у Выдавецкім доме “Звязда”. У кнігу ўвайшло 303 фотаздымкі ваенных фотакарэспандэнтаў. Яны ўяўляюць сабой унікальныя і бясцэнныя сведчанні аб Вялікай Айчыннай вайне, якія адлюстроўваюць нямала баявых эпізодаў, армейскі быт, атакі, пераправы, работу медсанбатаў, допыты палонных.
Выданне прадставяць Адамушка Уладзімір Іванавіч, дырэктар Дэпартамента па архівах і справаводстве Міністэрства юстыцыі Рэспублікі Беларусь і Рахманько Таццяна Леанідаўна, загадчык аддзела выкарыстання Беларускага дзяржаўнага архіву кінафотадакументаў.
Выстаўка фатаграфій “Вялікая Айчынная вайна ў здымках фотакарэспандэнта БелТА і ТАСС Уладзіміра Навумавіча Лупейкі” прадставіць гісторыю ваеннага і пасляваеннага часу вачыма чалавека, які прайшоў праз усю вайну і бачыў розныя бакі жыцця ў гэты цяжкі для краіны перыяд. Тэматычна экспазіцыя, якая будзе працаваць да 5 чэрвеня 2015 г., падзелена на некалькі цыклаў: пераможнае фота, фота ваеннага часу, адраджэнне Мінска ў пасляваенны перыяд.
Уладзімір Навумавіч 45 гадоў працаваў нязменна ў адным ведамстве – БелТА. Дапытлівасць, мабільнасць, пачуццё новага, любоў да людзей, уменне бачыць незвычайнае ў звычайным, цярпенне – вось тыя асноўныя якасці, якія дазволілі гэтаму чалавеку стварыць столькі выдатных “жывых” кадраў, якія застануцца многім пакаленням нашчадкаў на памяць і ў настаўленне. Ён пакінуў нам велізарны фотаархіў, які ўяўляе сабой творчую, культурную і гістарычную каштоўнасць.
Адкрыццё культурна-асветніцкага праекта “Славім вялікі подзвіг” адбудзецца а 16-й гадзіне ў галерэі “Лабірынт” (3-ці паверх).
Тэлефоны для даведак: (8 017) 293 27 56, 293 29 80.
Е-mail: pr@nlb.by
