4–8 верасня Нацыянальная бібліятэка Беларусі прымае ўдзел у 32-й Маскоўскай міжнароднай кніжнай выстаўцы-кірмашы.
У рамках мерапрыемства галоўная бібліятэка краіны падрыхтавала выстаўку “Вяртанне і аднаўленне кніжнай спадчыны”. У наведвальнікаў кірмашу з’явілася магчымасць даведацца больш пра традыцыі беларускага кніжнага мастацтва і пісьменства.
Нацыянальная бібліятэка мае багаты вопыт рэалізацыі праектаў па факсімільным узнаўленні кніжнай спадчыны. Вынікі шматгадовай працы прадстаўлены на выстаўцы.
Важнай часткай экспазіцыі сталі перавыданні старадаўніх беларускіх кніг – Слуцкага і Тураўскага Евангелляў, Жыція Еўфрасінні Полацкай, Баркалабаўскага летапісу, Буквара 1767г.
Наведвальнікаў чакаюць факсіміле “Дудка беларуская” Францыска Багушэвіча, “Калядная пісанка” (1913), перавыданні фундаментальнай працы Вацлава Ластоўскага “Гісторыя беларускай (крыўскай) кнігі”, прыжыццёвых работ Якуба Коласа “Сымон-музыка” і Янкі Купалы “Шляхам жыцця”.
Асабліва гасцей маскоўскага кірмашу можа зацікавіць факсіміле “Топографические примечания на знатнейшие места путешествия Ее Императорского Величества в белорусские наместничества”.
З апошніх праектаў бібліятэкі, прадстаўленых на выстаўцы – перавыданне першай у свеце кнігі пад назвай “Буквар” 1618 года.
Вынікі працы супрацоўнікаў Нацыянальнай бібліятэкі неаднаразова ацэньваліся на нацыянальным і міжнародным конкурсах “Мастацтва кнігі”, прэзентаваліся на разнастайных пляцоўках па ўсім свеце, у тым ліку ў штаб-кватэрах ААН і ЮНЕСКА.
Матэрыял прадастаўлены аддзелам сувязей з грамадскасцю.