Да 955-годдзя горада Мінска, у рамках юбілейнай выставы “100 рарытэтаў: ад гістарычных кнігазбораў да сучасных арт-кніг”, з фондаў Нацыянальнай бібліятэкі Беларусі прадстаўлены ўнікальны каляндар XIX ст.
130 гадоў таму, у 1892 г., у Мінску выйшаў “Северо-Западный календарь на 1893 г.” пад рэдакцыяй краязнаўца, гісторыка А. Слупскага, у афармленні мастака А. Харламповіча.
Чым жа адрозніваецца “Северо-Западный календарь на 1893 г.” ад сучаснага? Відавочная розніца ў аб’ёме. Каляндар XIX ст. – гэта паўнавартаснае кніжнае выданне ў цвёрдай вокладцы, з тытульным лістом і зместам. Тут размешчана нават невялікая рэклама кнігарні і бібліятэкі Е. Фрэнкеля, а таксама друкарні Мінскага губернскага праўлення.
Каляндар, выдадзены ў 1892 г., падобны на сучасныя тэматычныя календары, у якіх размешчаны даты рэлігійных святаў, карысныя парады, кулінарныя рэцэпты і г.д., але асобнік XIX ст. мае значна больш шырокі тэматычны ахоп. У ім адлюстраваны каляндар розных канфесій для шматнацыянальнага складу жыхароў беларускіх зямель: праваслаўны, рымска-каталіцкі і яўрэйскі календары. Размешчаны прадказанні надвор’я па папулярным у той час Брусавым календары. Акрамя таго, пазначаны астранамічныя даныя, розніца часу паміж гарадамі, паштовая інфармацыя, звесткі аб чыгуначных шляхах зносін і параходстве, праграмы і правілы для паступлення ў навучальныя ўстановы, юрыдычныя, сельскагаспадарчыя і іншая даведачная інфармацыя.
У дадатак да календара выдадзены літаратурны альманах, у якім можна прачытаць мастацкія творы, вершы на беларускай мове, а таксама пазнаёміцца з легендай пра Магілёў і артыкулам пра гісторыю Мінска А.І. Слупскага.
Выстава працуе ў музеі кнігі (пам. 347) па 31 снежня 2022 года.
Дата яе заканчэння можа быць зменена.
Час работы выставы адпавядае рэжыму работы музея кнігі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 22.
Матэрыял пададзены навукова-даследчым аддзелам кнігазнаўства.