17 лютага ў бібліятэцы ладзіўся семінар-трэнінг «Электронныя інфармацыйныя рэсурсы: магчымасці доступу праз віртуальную чытальную залу Нацыянальнай бібліятэкі Беларусі ў 2010 г.».
Мерапрыемства было арганізавана Нацыянальнай бібліятэкай Беларусі ў рамках сэрвісна-тэхналагічнага абслугоўвання віртуальнай чытальнай залы пры садзейнічанні Савета бібліятэк Беларусі па інфармацыйным узаемадзеянні.
У рабоце семінара-трэнінгу бралі ўдзел больш за 70 чалавек: спецыялісты бібліятэк Беларусі, навуковыя супрацоўнікі, выкладчыкі вышэйшых навучальных устаноў.
У рамках семінара былі абмеркаваны напрамкі развіцця віртуальнай чытальнай залы ў 2010 годзе, прайшла прэзентацыя новых электронных інфармацыйных рэсурсаў віртуальнай чытальнай залы, для супрацоўнікаў арганізацый-партнёраў праведзены трэнінг па арганізацыі працы карыстальнікаў, выкананні заказаў на базе электронных інфармацыйных рэсурсаў віртуальнай чытальнай залы.
З уступным словам да ўдзельнікаў семінара звярнуліся: намеснік дырэктара Нацыянальнай бібліятэкі Беларусі па інфармацыйных рэсурсах Кузьмініч Таццяна Васільеўна, загадчык інфармацыйнага цэнтра Нацыянальнай бібліятэкі Беларусі Шарамецьева Ала Анатольеўна. У ходзе семінара з дакладамі і прэзентацыямі выступілі супрацоўнікі Нацыянальнай бібліятэкі Беларусі.