27 лістапада ў Нацыянальнай бібліятэцы стартаваў першы з цыкла семінар-практыкум, прысвечаны вывучэнню ўнікальных помнікаў беларускай кніжнай культуры – кітабаў.
Эксперт мерапрыемства – Ірына Сынкова, кандыдат філасофскіх навук, дацэнт кафедры мовазнаўства і краіназнаўства Усходу факультэта міжнародных адносін Беларускага дзяржаўнага ўніверсітэта.
Кітабамі называюць рукапісныя кнігі, якія ствараліся на працягу стагоддзяў прадстаўнікамі адной з этнаканфесійных груп Беларусі – беларускімі татарамі. Гэтыя манускрыпты, напісаныя арабскай графікай, змяшчаюць тэксты на арабскай, некаторых цюркскіх, а таксама на беларускай і польскай мовах. Найстарэйшыя рукапісы са славянамоўнымі тэкстамі ў арабскай графіцы ўзыходзяць да XVII ст. Рэлігійныя і дыдактычныя творы, займальныя аповесці і апісанні рытуалаў, знахарскія і астралагічныя тэксты раскрываюць духоўны свет своеасаблівай культуры беларускіх татар.
Тэксты кітабаў уяўляюць цікавасць як аб’ект даследавання для розных спецыялістаў: гісторыкаў, філолагаў, рэлігіязнаўцаў, культуролагаў, кнігазнаўцаў, этнографаў і краязнаўцаў.
Семінар-практыкум складаецца з серыі заняткаў. Наступныя заняткі адбудуцца 4 снежня і 18 снежня 2019 г. а 18-й гадзіне. Месца правядзення: зал адукацыйных тэхналогій (пам. 346).
Запрашаюцца ўсе зацікаўленыя. Уваход вольны.
Тэлефоны для даведак: (8 017) 293 27 81, 293 27 82, (8 044) 579 39 07.
Матэрыял прадастаўлены навукова-даследчым аддзелам кнігазнаўства.
