3 кастрычніка ў Магілёве прайшоў семінар-практыкум “Рэгіянальны зводны электронны каталог (РЗЭК): тэхналогія працы, асаблівасці стварэння бібліяграфічных запісаў”.
Мерапрыемства было арганізавана на базе Магілёўскай абласной бібліятэкі імя У.І. Леніна ў сувязі з пачаткам работ па стварэнні РЗЭК бібліятэк Магілёўскай вобласці.
У семінары-практыкуме прынялі ўдзел спецыялісты бібліятэк, якія ўжо ўдзельнічаюць у РЗЭК, а таксама плануюць далучыцца да яго ў 2019 годзе: Цэнтралізаванай сістэмы дзяржаўных публічных бібліятэк г. Магілёва, Круглянскай цэнтралізаванай бібліятэчнай сістэмы, Бялыніцкай цэнтралізаванай бібліятэчнай сеткі, Цэнтралізаванай бібліятэчнай сеткі Быхаўскага раёна, Клімавіцкай бібліятэчнай сеткі.
Супрацоўнікі Нацыянальнай бібліятэкі Беларусі – Алена Ішуціна, загадчыца сектара падтрымкі сістэмы карпаратыўнай каталагізацыі, і Алеся Дзямідава, галоўны бібліятэкар сектара развіцця фарматаў BELMARC, – выступілі з дакладамі на тэму “Тэхналагічныя аспекты стварэння рэгіянальнай сеткі зводнага электроннага каталога бібліятэк Беларусі” і “Аб выніках аналізу якасці бібліяграфічных запісаў, выгружаных з лакальных электронных каталогаў бібліятэк-пастаўшчыкоў і падрыхтаваных для загрузкі ў РЗЭК бібліятэк Магілёўскай вобласці”.
На семінары абмяркоўваліся пытанні якаснага фарміравання бібліяграфічных запісаў, тэхналагічных прынцыпаў і метадаў работы бібліятэк ва ўмовах РЗЭК, а таксама былі вызначаныя кірункі далейшага развіцця карпаратыўнага рэсурсу.