13 верасня ў Нацыянальнай бібліятэцы Беларусі адбыўся чарговы навучальны семінар “Аўтарскае права і сумежныя правы” для прадстаўнікоў розных бібліятэк Рэспублікі Беларусь.
Ініцыятары семінара – Міністэрства культуры Рэспублікі Беларусь, Савет бібліятэк Рэспублікі Беларусь па інфармацыйным узаемадзеянні, Нацыянальная бібліятэка Беларусі.
З дакладамі выступілі супрацоўнікі Нацыянальнага цэнтра інтэлектуальнай уласнасці.
Падчас семінара былі раскрыты асноўныя палажэнні Закона Рэспублікі Беларусь “Аб аўтарскім праве і сумежных правах” ад 17 мая 2011 года. Асаблівую цікавасць удзельнікаў семінара выклікалі пытанні, якія датычацца абароны аўтарскага і сумежных праў, асноўных відаў дагавораў.
Па заканчэнні семінара яго ўдзельнікам былі выдадзены сертыфікаты Нацыянальнага цэнтра інтэлектуальнай уласнасці аб праходжанні другога этапу навучання.