19 чэрвеня ў бібліятэцы прайшоў творчы вечар Анатоля Бутэвіча, прысвечаны 70-гадоваму юбілею вядомага пісьменніка.
Чалавек вялікага таленту, актыўны грамадскі дзеяч, асветнік, краязнаўца Анатоль Бутэвіч усю сваю невычарпальную энергію прысвячае гісторыі і культуры Беларусі. Праяўляючы няўтольную цікавасць да традыцый і гісторыі роднага краю, славутых імёнаў і постацей, ён пасродкам свайго пісьменніцкага таленту данёс не адну дакладную і цікавую гісторыю да шматлікіх чытачоў.
За сваю ўнушальную кар’еру здзейсніў шэраг культурных праектаў і ініцыятыў, паспеў папрацаваць у газетах і выдавецтвах, на кіруючых і дыпламатычных пасадах – быў рэдактарам Беларускага тэлеграфнага агенцтва, намеснікам рэдактара газеты “Чырвоная змена”, дырэктарам выдавецтва “Мастацкая літаратура”, міністрам інфармацыі (1992–1994 гг.) і міністрам культуры і друку Рэспублікі Беларусь (1994–1996 гг.).
Два дзесяцігоддзі таму Анатоль Бутэвіч вызначыў яшчэ адзін вектар у сваёй творчай дзейнасці – пачаў пісаць творы для дзяцей, якія вучаць маладое пакаленне любові да роднай прыроды і прыгожага беларускага слова. Аўтар з задавальненнем праводзіць сустрэчы з чытачамі дзіцячых бібліятэк і школьнікамі, распавядае ім пра цуды Беларусі і гісторыю роднай краіны.
Павіншаваць пісьменніка прыйшлі блізкія і родныя людзі, сябры, калегі, прыхільнікі і аматары шматграннай творчасці аўтара, а таксама ганаровыя госці.
Найлепшыя пажаданні ў адрас юбіляра прагучалі ад імя старшыні Савета Рэспублікі Нацыянальнага сходу Рэспублікі Беларусь Міхаіла Мясніковіча, міністра культуры Рэспублікі Беларусь Юрыя Бондара, міністра інфармацыі Рэспублікі Беларусь Аляксандра Карлюкевіча, Надзвычайнага і Паўнамоцнага Пасла Рэспублікі Беларусь у Французскай Рэспубліцы, Каралеўстве Іспанія, Партугаліі і Княстве Манака Паўла Латушкі.
Цёплыя віншаванні віноўніку ўрачыстасці падчас вечара выказалі памочнік cтаршыні Савета Рэспублікі Нацыянальнага сходу Рэспублікі Беларусь Зыгмунд Валевач, намеснік міністра культуры Рэспублікі Беларусь Аляксандр Яцко, першы намеснік міністра інфармацыі Рэспублікі Беларусь Павел Лёгкі, дырэктар Нацыянальнай бібліятэкі Беларусі Раман Матульскі, старшыня Беларускага фонду культуры Тадэуш Стружэцкі, галоўны рэдактар “Краязнаўчай газеты” Уладзімір Гілеп, кіраўнікі дэлегацыі Нясвіжскага раёна, рэспубліканскіх устаноў і арганізацый.
Атмасферу святочнасці на працягу вечара стваралі ўдзельнікі музычнага калектыву “Брэвіс”. Нацыянальная бібліятэка Беларусі падрыхтавала кніжную выстаўку-прагляд, якая адлюстравала шматграннасць таленту Анатоля Бутэвіча.
Паважаны Анатоль Іванавіч! Прыміце шчырыя віншаванні з нагоды Вашага юбілею! Жадаем шчаслівага жыцця, добрага здароўя, бадзёрасці духу, творчага натхнення, новых цікавых выданняў і цёплых сустрэч!
