21–23 красавіка 2009 года дырэктар Нацыянальнай бібліятэкі Беларусі Р.С. Матульскі прыняў удзел у штогадовай міжнароднай канферэнцыі “Румянцаўскія чытанні – 2009”.
Канферэнцыя на тэму “Гісторыка-культурныя традыцыі і інавацыйныя пераўтварэнні Расіі. Асветніцкая адказнасць бібліятэк” прайшла ў Расійскай дзяржаўнай бібліятэцы (РДБ). У рамках мерапрыемства на плянарным пасяджэнні быў абмеркаваны шэраг актуальных праблем дзейнасці бібліятэк.
Удзельнікам канферэнцыі быў прадстаўлены праект “Ламаносаўская бібліятэка”, вынікам якога стала публікацыя 38 кніг (працы М.В. Ламаносава, выданні пра яго і пра “ламаносаўскую зямлю”). Плануецца, што частка тыражу будзе накіравана ў найбуйнейшыя бібліятэкі краін СНД.
Дырэктар Нацыянальнай бібліятэкі Беларусі Р.С. Матульскі выступіў з дакладам, прысвечаным гісторыі знакамітых бібліятэк Беларусі XI–XIX стст., і прадставіў электронную прэзентацыю Нацыянальнай бібліятэкі Беларусі. У час сустрэчы з дырэкцыяй РДБ было падпісана пагадненне аб супрацоўніцтве Расійскай дзяржаўнай бібліятэкі і Нацыянальнай бібліятэкі Беларусі.
У ходзе канферэнцыі таксама адбылося пасяджэнне прэзідыума Бібліятэчнай асамблеі Еўразіі (БАЕ) з удзелам прэзідэнта БАЕ, дырэктара Нацыянальнай бібліятэкі Беларусі Р.С. Матульскага; віцэ-прэзідэнта БАЕ, генеральнага дырэктара РДБ В.В. Фёдарава; віцэ-прэзідэнта БАЕ, дырэктара Нацыянальнай бібліятэкі Кыргызскай Рэспублікі Ж.К. Бакашовай; генеральнага дырэктара Нацыянальнай парламенцкай бібліятэкі Украіны Т.І. Велікжанінай і загадчыка аддзела міжбібліятэчнага ўзаемадзеяння з бібліятэкамі Расіі і краін СНД Г.А. Райковай (РДБ). Разгледжаны арганізацыйныя пытанні, выдавецкая дзейнасць, міждзяржаўныя праекты і інш.