Сёлета споўнілася 75 гадоў з дня нараджэння выбітнага беларускага кампазітара, народнага артыста Беларусі, кавалера ордэна Францыска Скарыны Эдуарда Барысавіча Зарыцкага. Сапраўдным падарункам для сусветнай музычнай супольнасці стала акцыя перадачы ў фонд Нацыянальнай бібліятэкі Беларусі рукапіснай спадчыны аўтара.
Мерапрыемства адбылося 21 красавіка і было прымеркавана да Сусветнага дня кнігі і аўтарскага права.
Маёмасныя правы на выкарыстанне нотных рукапісаў Э. Зарыцкага ў інфармацыйных рэсурсах Нацыянальнай бібліятэкі перадала дачка кампазітара Ліна Эдуардаўна Літц.
Усе прысутныя ўшанавалі памяць Эдуарда Барысавіча, аўтара музыкі больш чым да 600 песень, якія выконвалі і выконваюць вядомыя спевакі беларускай і расійскай эстрады. Кампазітар таксама пісаў музыку да спектакляў, кінафільмаў і мюзіклаў, стварыў цыклы твораў на вершы Адама Міцкевіча, Якуба Коласа і Уладзіміра Караткевіча. Ён з’яўляецца аўтарам сімфоній, сюіт, канцэртаў для габоя і валторны. Песня “Так пришла к нам победа” штогод гучыць над плошчай Перамогі ў Мінску 9 мая.
Песняй “Нас яднае хор” адкрыў мерапрыемства ўзорны хор старшых класаў “Децима” пад кіраўніцтвам Аляксея Клімовіча Дзіцячай музычнай школы мастацтваў № 10 імя Я.А. Глебава.
З прывітальным словам да ўдзельнікаў акцыі звярнуўся генеральны дырэктар Нацыянальнай бібліятэкі Беларусі Раман Матульскі.
Цёплымі ўспамінамі пра сяброўства і супрацоўніцтва з кампазітарам падзяліліся заслужаны артыст Беларусі Уладзімір Правалінскі, член Беларускага саюза кампазітараў Вольга Брылон, мастацкі кіраўнік творчай майстэрні эстраднага мастацтва “Хвілінка” Таццяна Панова, дырэктар міжнароднага грамадскага маладзёжнага харавога аб’яднання “Камертон” Уладзімір Лой, музычны тэлежурналіст, радыё- і тэлерэдактар Людміла Палкоўнікава.
На мерапрыемстве прагучалі песні “Плылі гусанькі” ў выкананні Кацярыны Шумскай, “Ехал князь” у выкананні Лізы Яроцкай. Музыку да гэтых твораў напісаў Эдуард Зарыцкі.
У рамках акцыі госці змаглі азнаёміцца з выставай, на якой былі прадстаўлены матэрыялы пра яго жыццё і творчасць.
Нацыянальная бібліятэка Беларусі выказвае ўдзячнасць Ліне Эдуардаўне за каштоўны падарунак для чытачоў бібліятэкі, Яўгену Рыгоравічу Фамбараву за значную дапамогу ў арганізацыі перамоў з дачкой Эдуарда Барысавіча, а таксама ўсім, хто ўзяў удзел у мерапрыемстве, хто цэніць і памятае творчасць вядомага беларускага кампазітара.
Матэрыял пададзены аддзелам фарміравання электроннай бібліятэкі.
