13–14 сакавіка ў г. Ашхабадзе (Туркменістан) прайшла міжнародная навуковая канферэнцыя "Рукапісы – першасная крыніца вывучэння нацыянальнай спадчыны", у якой бралі ўдзел супрацоўнікі Нацыянальнай бібліятэкі Беларусі.
Сярод удзельнікаў мерапрыемства, арганізаванага Нацыянальным інстытутам рукапісаў імя Туркменбашы Акадэміі навук Туркменістана пад патранажам прэзідэнта Туркменістана Гурбангулы Бердымухамедава, акрамя супрацоўнікаў навуковых і адукацыйных устаноў Туркменістана, прысутнічалі каля 60 прадстаўнікоў з 30 краін Азіі, Блізкага Усходу і Еўропы.
У рабоце канферэнцыі ўзялі ўдзел дырэктар Нацыянальнай бібліятэкі Беларусі Р.С. Матульскі, які выступіў з дакладам "Летапісы як першакрыніца па гісторыі Беларусі", і галоўны бібліёграф навукова-даследчага аддзела кнігазнаўства Т.В. Карнілава – з дакладам "Усходнія рукапісы ў фондзе Нацыянальнай бібліятэкі Беларусі (к стварэнню каталога рукапісаў)".
Работа канферэнцыі была арганізавана ў рамках 2-х пленарных пасяджэнняў і 5-ці секцый:
- "Вывучэнне рукапісаў у эпоху росквіту моцнай дзяржавы і магчымасці развіцця міжнароднага супрацоўніцтва ў дадзеным кірунку",
- "Рукапіс – надзейная крыніца вывучэння мовы, літаратуры і нацыянальнай спадчыны",
- "Таямнічыя старонкі гісторыі і тэксты рукапісаў",
- "Сучасныя магчымасці і інавацыйны вопыт па захаванні рукапісаў",
- "Рукапісы: асноўныя пытанні каталагізацыі і навуковай анатацыі".
Удзельнікамі канферэнцыі была выказана прапанова аб стварэнні на базе Нацыянальнага інстытута рукапісаў імя Туркменбашы каардынацыйнага цэнтра па выяўленні, зборы, апісанні і вывучэнні рукапісных матэрыялаў, стварэнні зводнага каталога і паўнатэкставай базы даных усходніх рукапісаў.
Паколькі ў Нацыянальнай бібліятэцы Беларусі захоўваецца 31 усходні рукапіс і ўсе рукапісы ўжо апрацаваны, апісаны і падрыхтаваны для выдання ў выглядзе друкаванага каталога, то з беларускага боку была выказаная гатоўнасць прыняць удзел у дадзеным праекце. Нацыянальная бібліятэка Беларусі гатова падаць Нацыянальнаму інстытуту рукапісаў імя Туркменбашы ўсе неабходныя матэрыялы для стварэння зводнай базы даных усходніх рукапісаў і сумеснай падрыхтоўкі друкаванага каталога.
У рамках канферэнцыі дырэктар Нацыянальнай бібліятэкі Беларусі Р.С. Матульскі наведаў Нацыянальную бібліятэку Туркменістана імя Сапармурата Туркменбашы і правёў перамовы з дырэктарам бібліятэкі Г.Д. Мухаметкуліевай. Пад час сустрэчы была праяўлена велізарная зацікаўленасць у развіцці супрацоўніцтва з Нацыянальнай бібліятэкай Беларусі, асабліва ў галіне кнігаабмену.
 |
 |
 |
